Foto: Aqorda
Is-sharaǵa salalyq memlekettik organdardyń ókilderi, sondaı-aq Qazaqstandaǵy IýNESKO komıtetteriniń jetekshileri men basqa da sarapshylyq qaýymdastyqtarynyń músheleri qatysty.
Otyrysta IýNESKO jáne ISESKO uıymdarymen ózara is-qımyldy damytýdyń basym baǵyttary men aldaǵy josparlary talqylandy. Erlan Qarın Prezıdenttiń IýNESKO-men yntymaqtastyqty nyǵaıtýǵa aıyryqsha kóńil bólip otyrǵanyn atap ótip, Memleket basshysynyń osy baǵytta bergen tapsyrmalaryn oryndaýdyń mańyzyna toqtaldy.
Jıynda jasandy ıntellekt salasyndaǵy halyqaralyq ozyq tájirıbeni zerdeleý jáne sý máselesine qatysty jahandyq kún tártibin ilgeriletý jóninde naqty mindetter qoıyldy.
Sonymen qatar IýNESKO jáne ISESKO uıymdarynyń Astanada ótken О́ńirlik ekologııalyq sammıt jáne IýNESKO aıasynda uıymdastyrylǵan Altyn Ordaǵa arnalǵan halyqaralyq sımpozıým sekildi mańyzdy is-sharalardy uıymdastyrýǵa qosqan qomaqty úlesi joǵary baǵalandy.
Otyrysqa qatysýshylar aldaǵy is-sharalarǵa daıyndyq máselelerin de pysyqtady. Atap aıtqanda, IýNESKO shtab-páterinde opera ánshisi Ermek Serkebaev pen rejısser Abdolla Qarsaqbaevtyń 100 jyldyq mereıtoılaryn atap ótý, sondaı-aq Pýsan qalasynda uıymdastyrylatyn IýNESKO-nyń Búkilálemdik muralar komıtetiniń 48-sessııasyna qazaqstandyq delegasııanyń qatysýy sekildi máseleler talqylandy. Atalǵan sessııada Qazaqstan usynǵan «Mańǵystaýdyń jerasty meshitteri» nomınasııasy qaralady.
Eske sala keteıik, buǵan deıin Mańǵystaýdaǵy jerasty meshitteri IýNESKO-nyń Búkilálemdik muralar tizimine enýi múmkin ekenin jazǵan edik.
