MEMLEKET BASShYSY ALǴYS AITADY

Memleket basshysy N.Á.Nazarbaevtyń týǵan kúni men Astana kúni merekesi bıyl el ómirindegi asa aıtýly oqıǵalardyń birine aınaldy. Buǵan osy kúnderi elimizdiń túkpir-túkpirinen jáne alys-jaqyn shet memleketterden Qazaqstan Respýblıkasy Prezıdentiniń Keńsesine – Memleket basshysynyń atyna tolassyz túsip jatqan quttyqtaý hattarynyń legi kýá. Atap aıtqanda, búgingi kúnge deıin osy eki oqıǵaǵa baılanysty bir-birinen ajyraǵysyz, ózara ushtastyra baıandalatyn 5 myńǵa tarta jedelhattar, ashyq hattar men quttyqtaý mazmunyndaǵy ózge de hattar kelip tústi, dep habarlady Qazaqstan Respýblıkasy Prezıdentiniń baspasóz qyzmeti. Quttyqtaýshylar arasynda mek­tep oqýshylarynan zeınetkerlerge, qarapaıym eńbek adamdarynan qoǵam jáne memleket qaıratker­leri­ne deıingi qoǵamdaǵy barlyq áleýmettik toptardyń ókilderi bar. Túrli óndiris oryndary men meke­me­lerden jáne qoǵamdyq uıym­dar­dan da ujymdyq hattar kóptep tú­sýde. Quramynda myńdaǵan adamdar eńbek etetin elimizdiń iri óndiris oryndary men aýyl sharýashylyǵy kásiporyndarynan, túrli bıýdjettik mekemeler men joǵary oqý oryn­darynan, arnaýly jáne orta bilim uıalarynan, ǵylymı ınstıtýttardan túsip jatqan osyndaı ujymdyq quttyqtaýlardyń aıasy shamamen jarty mıllıonnan astam aýdıto­rııany qamtıtyny baıqaldy. Memleket basshysynyń atyna jiberilgen osynshalyq mol qut­tyq­taý hat-habarlardyń “Nur Otan” ha­lyqtyq-demokratııalyq partııa­sy­nyń atyna da túskenin aıta ket­ken jón. Jekelegen azamattardyń, sondaı-aq kásiporyndar, mekeme­ler men uıymdar ujymdarynyń hattary men jedelhattarynda, atap aıtqanda, qoǵamnyń ózekti sura­nym­daryna jedel den qoıyp, bú­gin­gi tańdaǵy memleketimizdiń al­dynda turǵan strategııalyq mindet­ter­di iske asyrýdy qamtamasyz etý­di maqsat tutqan naǵyz búkilha­lyq­tyq saıası uıymǵa aınalǵan par­tııanyń róli men mańyzy onyń Tóraǵasy N.Á.Nazarbaevtyń bıik bedeli arqasynda anaǵurlym óse túskeni basa aıtylǵan. Sondaı-aq, shetel basshylary­nan jáne esimderi álemge tanymal mem­leket jáne qoǵam qaırat­ker­le­ri­nen túsken quttyqtaýlar da óte kóp. Quttyqtaý joldaýshylardyń bá­ri de táýelsizdikke jańa qol jet­kizgen jas memleketimizde ult­ara­lyq kelisim men saıası turaqty­lyq­ty qamtamasyz ete otyryp, tarıhı qysqa merzim ishinde ony joǵary ekonomıkalyq qarqynmen damyp otyrǵan elderdiń qataryna qosqan, burynǵy Keńes Odaǵynyń qu­ramyn­daǵy kóp respýblıkalardyń birin álemdegi tanymal ári bedeldi memleketke aınaldyra bilgen Mem­leket basshysynyń uıymdastyrý­shylyq uly eńbegi men kemeńgerlik basshylyǵyn joǵary baǵalap, ózde­ri­niń aq tilekteri men júrekjardy lebizderin úlken tebirenis sezimmen jetkizedi. Hat ıeleri Elbasynyń álemde alǵashqy bolyp atom qarýynan óz erkimen bas tartqan, memlekettiń shekaralyq shepterin aıqyndap, alys-jaqyn elderdiń bárimen ózara syılastyq pen ekonomıkalyq tıim­dilikke negizdelgen baılanys ornatqan, az jyldardyń ishinde álem­di tań qaldyrǵan jańa Astana salǵyzǵan, ultaralyq tatýlyqty qamtamasyz etý maqsatynda Qazaq­stan halqy Assambleıasy ınstıtý­tyn ómirge ákelgen, elimizdi álem­dik ıntegrasııaǵa kiriktirip, beıbit­shi­lik pen yntymaqtastyqty ny­ǵaıtý úshin jańa ári asa mańyzdy halyqaralyq uıymdardyń tabandy uıymdastyrýshysy ári belsendi jaqtaýshysy bolǵan, “Bolashaq” baǵ­darlamasy boıynsha shet mem­le­ket­terde jańa mamandar legin daıar­lat­qan, “Jasyl el” baǵdarlamasyn keń kólemde qolǵa alǵyzǵan, asa aýqymdy ındýstrııalyq-ınnova­sııa­lyq jobany júzege asyrýǵa kirisken tarıhı mańyzy orasan zor ári kóregendik sheshimderin úlken qanaǵat sezimmen jáne maqta­nyshpen, súısine atap ótedi. Hat ıeleri sondaı-aq Nursultan Ábishulyn Elbasy mártebesine ıe bolýymen shyn júrekten quttyq­tap, el Parlamentiniń osy oraıda qabyldaǵan tarıhı sheshimin qyzý qýattaıtyndyqtaryn málimdeıdi. Eń bastysy, hat joldaýshylar osy bastamalardyń báriniń de Qazaqstan halqynyń áleýmettik-turmys jaǵdaıynyń barǵan saıyn jaqsara túsýine oń áser etip otyr­ǵa­nyna jáne álemdik qarjy daǵ­darysyna qaramastan, bizdiń elimizde eńbekaqy men zeınetaqy mólsheriniń udaıy ósý ústinde ekendigine rızashylyq tanytady. Sondaı-aq quttyqtaýlar leginiń úlken bir bóligin jaqyn kórshimiz Reseı Federasııasynan kelgen hattar quraıdy. Osy eldiń tanymal memleket jáne qoǵam qaıratkerleri men qarapaıym azamattary Qazaq­stan Respýblıkasy Tuńǵysh Pre­zıdentiniń óz elin qysqa merzim ishinde álemdegi bedeldi memleket­ter­diń birine aınaldyrýdaǵy ja­sam­­pazdyq eńbegin súısine ári naqty moıyndap qana qoımaı, ony barynsha joǵary baǵalaıdy. Árı­ne, ásirese Reseı saıası elıtasynyń atynan aıtylyp jatqan bul pikir­lerdiń belgili bir dárejede osy el halqynyń búkil qazaqstandyqtarǵa degen oń kózqarasynyń da kórinisi ekeni sózsiz. Al munyń ózi eki el ara­syndaǵy tatý kórshilik, ekono­m­ıkalyq, saıası jáne mádenı baı­lanystardyń odan ári tereńdeı túsýine ári azamattardyń ózara yntymaqta ómir súrýine ıgi yqpal etetini sózsiz. Quttyqtaý hattar sondaı-aq AQSh, Avstrııa, Bolgarııa, Ger­ma­nııa, Grekııa, Japonııa, Koreıa, Izraıl, Nıderlandy, Túrkııa, Uly­brıtanııa, Fransııa, Estonııa sııaqty alys shet elder men Ázir­baıjan, Belarýs, Grýzııa, Qyr­ǵyz­stan, Ýkraına, t.b. memleketterdiń azamattarynan, saıası, qoǵam jáne mádenıet qaıratkerlerinen, son­daı-aq iri bıznes ókilderinen kelip túsýde. Prezıdent Keńsesi ol qut­tyq­taýlardyń birsypyrasyn respýb­lıkalyq “Egemen Qazaqstan” jáne “Kazahstanskaıa pravda” gazetteri bet­terinde jarııalaýǵa usynyp otyr­dy. Al, jalpy, kelgen quttyq­taýlardyń barlyǵy Qazaqstan Respýblıkasy Tuńǵysh Prezı­dentiniń murajaıynda saqtalatyn bolady. О́ziniń atyna kelip túsken aýqym­dy poshtamen tanysa oty­ryp, Memleket basshysy N.Á.Na­zarbaev memleketter men úkimetter basshylaryna, halyqaralyq uıym­dardyń jetekshilerine, memleket jáne qoǵam qaıratkerlerine, shetel azamattaryna, sondaı-aq otandas­ta­ry­myzǵa olardyń quttyqtaýlary men jyly lebizderi úshin shynaıy alǵysyn bildirdi.