«Saryarqa» jartylaı fınaldyń alǵashqy oıynynda ese jiberdi

ASTANA. 28 naýryz. Joǵary hokkeı lıgasynda «Bratına» kýbogy úshin synǵa túsip jatqan Qaraǵandynyń «Saryarqasy» jartylaı fınaldaǵy alǵashqy oıynyn ótkizdi. Bizdiń komandanyń bul syndaǵy qarsylasy Neftekamskiniń «Torosy» ekeni belgili. Bul týraly egemen.kz habarlady. Oıyn Qaraǵandyda ótti. Alǵashqy kezeńde aıdyn ıeleri basym boldy. Kezdesýdiń 4-mınýtynda Robert Makmıllan esep ashyp, «Saryarqany» alǵa shyǵardy. Al arada 29 sekýnd ýaqyt ótkende esep bizdiń paıdamyzǵa 2:0-ge jetti. Bul joly mergendigimen Andreı Plehanov kózge tústi. Ekinshi kezeń teń jaǵdaıda órbidi. Qos tarap qansha tyrysqanymen tablodaǵy esep ózgergen joq. Sheshýshi kezeńde qonaqtar belsendi boldy. 41-mınýtta Kırıll Polozov esep aıyrmasyn qysqartsa, 48-mınýtta Igor Skorohodov tarazy basyn teńestirdi. Qonaqtar ekinshi shaıbany oıynshy basymdyǵyna ıe bolǵan kezde soqqanyn aıta keteıik. Negizgi ýaqyttyń sońyna deıin birin biri ala almaǵan qarsylastar qosymsha kezeńge júgindi. Bul kezeńniń 3-mınýtynda taǵy da «Saryarqanyń» bir hokkeıshisi kishi aıyppen jazalanyp, Neftekamskiden kelgen komanda tamasha múmkindikke ıe boldy. Berilgen ońtaıly sátti múlt jibermegen olar jeńis shaıbasyn soǵyp, oıyndy óz paıdalaryna aıaqtady. Komandasyna jeńis syılaǵan Kırıll Nıkonorov ekenin aıta keteıik. Endi erteń qos qarsylas ekinshi oıyn úshin aıdynǵa shyǵady. Atalǵan tartystyń da Qaraǵandyda ótetini belgili. Elaman Qońyr. Derek: egemen.kz. Sýret: thenews.kz.