Denıs Ten – álem chempıonatynyń qola júldegeri!

ASTANA. 28 naýryz. Qytaıdyń Shanhaı qalasynda ótken mánerlep syrǵanaýdan álem chempıonatynda otandasymyz Denıs Ten qola júldemen shektelýge májbúr boldy. Bul týraly egemen.kz habarlady. Búgin ótken erkin baǵdarlama saıysynda sportshymyz óte joǵary deńgeıde óner kórsetti. Sonyń nátıjesinde, 181,83 upaı oljalap, kishi altyn medaldi ıemdendi. Kishi kúmis júlde ıspan sportshysy Haver Ernandeske buıyrdy. Ol bul saıysta 181,16 upaı jınady. Al Japonııa senim artqan Iýdzýrý Hanıý erkin baǵdarlamada basty eki básekelesinen aıtarlyqtaı qalyp qoıdy. Bul joly onyń ónerin tóreshiler 175,88 upaımen baǵalady. Qos jarys kúniniń qorytyndysy boıynsha Haver Ernandes (273,90 upaı) álem chempıony atansa, Iýdzýrý Hanıý (271,08 upaı) kúmis júldeni qanjyǵasyna baılady. Al jalpy esepte 267,72 upaı jıǵan Denıs Ten álem chempıonatynyń qola júldesin oljalady. Jasyratyny joq, bul dodada Denısten tek altyn medal kúttik. Sebebi, ol chempıon atanýǵa ábden laıyq edi. Degenmen, keshe ótken qysqa baǵdarlama saıysynda uıymdastyrýshylar óreskel qatelikke boı aldyryp, bizdiń sportshynyń ónerine keri áserin tıgizdi. Naqty aıtar bolsaq, Denıs aıdynǵa shyqqan kezde uıymdastyrýshylar onyń áýenin durys qoımaı, sonyń saldarynan sportshymyzdyń júıkesine aıtarlyqtaı salmaq túsirdi. Aıta keteıik, otandasymyz úshin bul – álem chempıonatynyń ekinshi medali. Osyǵan deıin Tenniń 2013 jyly Kanadada ótken álem chempıonatynda kúmis júldeger atanǵany esimizde. Sondaı-aq, Denıstiń enshisinde Olımpıadanyń (Sochı, 2014 j.) qola júldesi men qysqy Azııa oıyndarynyń (Astana, 2011 j.) altyn medali bar. Odan bólek, osydan bir jarym aı buryn Ońtústik Koreıada ótken tórt qurlyq týrnırinde chempıon atanǵan bolatyn. Bıylǵy álemdik dodanyń qyzdar arasyndaǵy básekesinde Reseı sportshysy Elızaveta Týktamyshevaǵa teń keler qarsylas tabylmady. Jalpy esepte 210,36 upaı jınaǵan ol álem chempıony atandy. Kúmis júlde Satoko Mııaharaǵa (Japonııa, 193,60 upaı) buıyrsa, qola medal Týktamyshevanyń otandasy Elena Radıonovanyń (191,47 upaı) enshisine jazyldy. Elaman Qońyr. Derek: egemen.kz. Sýret: «Qazaqstan» ulttyq telearnasy.