Sezd qarsańynda strategııalyq sessııa uıymdastyrylyp, delegattar partııanyń aldaǵy kezeńdegi basym baǵyttaryn talqylady.
II Sezd qatysýshylarynyń aldynda sóz sóılegen partııa tóraǵasy Aıbek Dádebaı Qazaqstannyń jańa damý kezeńine aıaq basqanyn atap ótip, saıası kúshterden reformalardy qoldaý ǵana emes, halyqpen tyǵyz jumys júrgizý jáne azamattardyń suranystaryna naqty jaýap berýdi talap etetinin aıtty.
«Biz Prezıdent Qasym-Jomart Toqaevtyń Ádiletti Qazaqstan qurý baǵytyn tolyq qoldaımyz jáne ony memleketti uzaq merzimdi nyǵaıtýdyń strategııalyq baǵdary dep sanaımyz. Alaıda reformalardyń tabysy tek memlekettik sheshimderge ǵana baılanysty emes. Ol qoǵamnyń ózgeristerge qatysýǵa daıyndyǵymen jáne saıası kúshterdiń jaýapkershilikpen ári jasampazdyqpen áreket ete bilýimen aıqyndalady. «Ádilet» partııasy qurylǵan kezde biz bir qarapaıym ári qaǵıdatty ustanymdy negizge aldyq: ádiletsiz turaqty damý bolmaıdy. Ádil erejeler ornaǵan jerde senim qalyptasady. Senim bar jerde ınvestısııa keledi, kásipkerlik damıdy, azamattyq belsendilik artyp, qoǵamdyq birlik nyǵaıady», dedi Aıbek Dádebaı.
Sezdegi mańyzdy sheshimderdiń biri – Qazaqstannyń barlyq óńirinde partııa fılıaldaryn qurý. Delegattar tıisti sheshimdi qoldap, fılıaldardyń qyzmet tártibin aıqyndaıtyn erejeni bekitti.
«AMANAT» partııasynyń músheleri «Ádilet» qataryna qosyla ala ma?
Partııa Saıası keńesiniń múshesi Bórihan Nurmuhamedovtiń aıtýynsha, partııanyń bolashaqtaǵy damýy óńirlerdegi tıimdi jumys jáne azamattarmen turaqty dıalogqa tikeleı baılanysty.
«Partııanyń taǵdyry óńirlerde sheshiledi. Bizdiń jumysymyzdyń negizgi alańy da sol jerde. Azamattardyń senimi de óńirlerde qalyptasady. Adamdar partııany kún saıyn naqty isterine, bastamalaryna jáne nátıjelerine qarap baǵalaıdy. Sondyqtan oblystyq fılıaldar qoǵamdyq jáne saıası ómirdiń tolyqqandy ortalyǵyna aınalýǵa tıis», dedi B. Nurmuhamedov.
Partııa ókilderiniń aıtýynsha, óńirlik jelini damytý qoǵamdyq jumysqa jańa kóshbasshylardy tartýǵa jáne azamattardyń qoǵamdyq-saıası úderisterge qatysý múmkindigin keńeıtýge jol ashady.
«Partııalyq jeliniń damýy azamattarǵa memlekettik sheshimderdi qabyldaýǵa yqpal etip, azamattyq qoǵamdy nyǵaıtýǵa múmkindik beredi», dedi Qostanaı avtomobıl kóligi kolledjiniń dırektory ári partııa Saıası keńesiniń múshesi Dmıtrıı Pavlenko.
Sezd barysynda adamı kapıtaldy damytý, bilim berý salasy, zamanaýı tehnologııalardy damytý jáne azamattyq qoǵam ınstıtýttaryn nyǵaıtý máseleleri de talqylandy.
«AMANAT» Sezi Prezıdent reformalaryna qoldaý kórsetý jolynda «Ádiletke» qosylýdy maquldady
Sezd jumysyn qorytyndylaı kele, qatysýshylar partııa quramyn keńeıtý jáne saıası qyzmettiń tıimdiligin arttyrý arqyly partııanyń áleýetin odan ári kúsheıtý máselesin qarastyrdy.
«AMANAT» partııasynyń «Ádilet» partııasyna qosylýy máselesi boıynsha sóılegen Aıbek Dádebaı qazirgi zamannyń syn-qaterleri qoǵam aldynda turǵan naqty mindetterdi sheshýge baǵyttalǵan syndarly dıalog pen nátıjeli praktıkalyq jumysty talap etetinin atap ótti.
«AMANAT partııasynyń «ÁDILET» partııasyna qosylýy – tar partııalyq múddeden joǵary turǵan, ulttyq jaýapkershilikke negizdelgen parasatty sheshim. Bul – Qazaqstan qoǵamynyń el múddesi úshin birige alatyndyǵymyzdyń naqty dáleli. Qoǵam men memleket aldyndaǵy jáne keler urpaq aldyndaǵy jaýapkershilikten týyndaǵan, eldik berekege bastaıtyn baılam», dedi partııa tóraǵasy Aıbek Dádebaı.
Talqylaý qorytyndysy boıynsha delegattar Amanat partııasynyń «Ádilet» partııasyna qosylýy týraly sheshimdi qoldady. Tıisti sheshim II Sezdiń qaýlysyna engizildi.
Eske salaıyq, keshe «Aq jol» demokratııalyq partııasynyń Sezi ótti. Onda Azat Perýashev «Aq jol» partııasy tóraǵasy qyzmetinen ketetinin málimdedi. Partııanyń jańa tóraǵasy bolyp Danııa Espaeva saılandy.
