Golovkın bul mártebege ıe bolǵan alǵashqy el sportshysy atandy. Onymen birge bul tizimge eks-chempıondar Antonıo Tarver men Naıdjel Benn de endi.
Dańq zalyna kirý sharty boıynsha sońǵy jekpe-jekten keminde úsh jyl ótýi kerek. Golovkın sońǵy ret 2022 jyldyń qyrkúıeginde rıngke shyqqan.
Endi GGG esimi Muhammed Álı, Maık Taıson, Floıd Meıvezer men Mennı Pakıao sekildi álemdik boks ańyzdarymen qatar atalady.
Golovkın Qazaqstannan shyqqan alǵashqy, al TMD elderinen shyqqan tórtinshi boksshy bolyp osy mártebege ıe boldy. Buǵan deıin bul tizimge Konstantın Szıý, sondaı-aq aǵaıyndy Klıchkolar engen.
Sport mınıstri: Gennadıı Golovkınniń World Boxing basshysy bolýy – úlken jetistik
Áýesqoı boksta Golovkın 350 jekpe-jektiń 345-inde jeńiske jetip, 2004 jylǵy Olımpıadada kúmis júlde ıelengen. Kásipqoı rıngte ol 42 jeńis, 2 jeńilis jáne 1 teń nátıje kórsetken.
GGG orta salmaqta WBC, WBA, IBF jáne IBO tujyrymdary boıynsha álem chempıony atanyp, nokaýttar sany boıynsha Gınnestiń rekordtar kitabyna engen.
Qazirgi tańda Gennadıı Golovkın Qazaqstan Ulttyq Olımpıadalyq komıtetin basqaryp, sondaı-aq World Boxing uıymynyń prezıdenti qyzmetin atqarady.
Eske sala keteıik, buǵan deıin meksıkalyq boksshy Saýl Alvares Gennadıı Golovkınniń kásipqoı boksqa qaıta oralýy múmkin ekenin aıtqan bolatyn. Gennadıı Golovkın kásipqoı bokstaǵy sońǵy kezdesýin Kaneloǵa qarsy ótkizgen edi. Úsh kezdesýdiń qorytyndysynda bir teń nátıje tirkelse, eki jekpe-jekte Kanelo basym tústi.
