Foto: Egemen.kz / ChatGPT
ChatGPT-den ómirlik aqyl-keńes suraıtyndar týraly naqty statıstıka joq. Sondyqtan OpenAI olardyń naqty úlesin jarııalamaıdy. Belgilisi, paıdalanýshylar kóbine oqý men bilim alýǵa, mátin jazýǵa, aýdarma jasaýǵa, baǵdarlamalaýǵa, jumys pen bızneske qatysty saýaldar joldaıdy.
Qazir bul baǵdarlamaǵa densaýlyǵyndaǵy kináratty aıtyp, syrqatyna em izdeıtinder de kóbeıgen. Dárigerlerdiń aıtýynsha, pasıentterdiń syrqaty asa qaýipti bolmasa da, ChatGPT-diń keńesinen keıin psıhologııalyq turǵyda aýyryp qalatyndar da kezdesedi.
«Qazirgi ýaqytta zaman talabyna saı ınternet jelisimen qatar ChatGPT de joǵary deńgeıde jumys istep jatyr. Naýqastar dárigerge kelmes buryn ózderine dıagnoz qoıyp, moraldy turǵyda aýyryp keledi, psıhologııasy synyp qalady. Ár adamda organızm ár túrli, patogenezi jáne ol aýrýdyń ótýi ár túrli bolady, soǵan oraı ChatGPT-ge senbeýlerińizdi suraımyn. О́zime syrqaty týraly aldyn ala ChatGPT-den oqyp alatyn naýqastar jıi keledi. ChatGPT olarǵa birden «rak» dep dıagnoz qoıyp, qajet emes analızdermen zertteýlerge ótýge usynys beredi. Sol sebepti ChatGPT-ge sene bermeýdi suraımyn», dedi Qorǵaljyn aýdandyq aýrýhanasynyń onkolog dárigeri Aqjol Balǵabaeva.
Imam AI: Endi jasandy ıntellekt dinı suraqtarǵa jaýap beredi
Al Astana qalasynyń turǵyny Ásel Quranova dál osy baǵdarlamanyń aqyl-keńesi arqyly balasynyń terisine shyqqan jarany jazyp alǵanyn aıtady. Onyń sózinshe, otbasymen elordaǵa kóship kelgennen keıin qyzynyń terisi ózgere bastaǵan. Jeke klınıka dárigeri 10 kúnge jaqpa maı jaǵýǵa keńes bergen. Alaıda bir aptadan soń dári jaqqan aýmaqtyń barlyǵy bórtip, qyzaryp, jaranyń aýyzy ylǵaldanyp ketken.
«Dáriger usynǵan preparattan soń, teriniń túsi ózgergen aýmaqqa irińdi jara shyǵa bastady. Biraz ýaqyttan keıin sol aýmaq ár jerden dóńgelenip, qabyrshaqtanyp ketti. Sýretke túsirip, ChatGPT-den suradym. Júıe munyń temiretki ekenin aıtyp, odan qutylýdyń joldaryn jazdy. Usynǵan kremdi satyp alyp, azdap jaǵyp kórdim, alǵashqy kúni-aq terisi tegistelip, tazardy. Osydan keıin keıde kómegi tıetinine kózim jetti», deıdi Ásel Quranova.
ChatGPT-diń kómegimen kóligin jóndep alǵandar da bar eken. Elordalyq Tımýr Janǵozy kóliginiń daýysy ózgergenin baıqaǵan soń, ony beınejazbaǵa túsirip, baǵdarlamaǵa júktegen.
«Men ChatGPT týraly múlde bilmeıdi ekenmin. Kelinshegim aıtqan soń, vıdeo júktep, suraq qoıdym. Kánigi motorıster sekildi kóliktiń qaı jerinde aqaý bar ekenin aıtyp berdi. Sonda da mamandarǵa apardym. Biraq olar da ChatGPT tapqan aqaýlardy aıtyp, jóndep berdi», deıdi qala turǵyny.
Eske salaıyq, byltyr Qazaqstan musylmandary dinı basqarmasy ChatGPT jáne ózge de jasandy ıntellekt platformalarynan sharıǵı úkim, dinı pátýa nemese dinge qatysty keńes suraýǵa bolmaıtynyn málimdegen bolatyn.
«Jasandy ıntellekt – paıdaly qural. Biraq dinı úkim berý – úlken jaýapkershilik. Sondyqtan bul iste bilimdi pátýa mamandaryna júgingen durys. Al jasandy ıntellektini tek kómekshi qural retinde jalpy málimet úshin ǵana paıdalanǵan jón», degen edi basqarmanyń sharıǵat jáne pátýa bólimi.
60 jyldyq jumbaq: 23 jastaǵy jigit ChatGPT kómegimen kúrdeli eseptiń sheshimin tapty
Keıin basqarmada Imam AI jobasy tanystyryldy. Bul joba dinı suraqtarǵa jedel jaýap berýge negizdelgen ıntellektýaldy júıe.
«Atalǵan joba zamanaýı tehnologııalardy qoldaný arqyly jamaǵatqa jedel ári sapaly aqparat usynýdy, suraqtarǵa jedel jaýap berý júıesin qalyptastyrýdy kózdeıdi», delingen habarlamada.
Psıholog Anargúl Ibraıymbekova jasandy ıntellekt psıhologııalyq keńes berýdiń negizin almastyra almaıtynyn, biraq paıdaly resýrs retinde qyzmet ete alatynyn aıtady.
«Jasandy ıntellekt psıhologııalyq saýattylyqty arttyrý, belgili bir kúızelis, mazasyzdyq nemese emosııanyń teorııalyq anyqtamasyn túsinýge kómektesedi. Máselen, kúızelis pen uıqysyzdyqtyń sebebi men saldaryn túsindiredi. Jattyǵýlar men ádistemelerdi úırený, tynys alý tehnıkasyn, kognıtıvti-minez-qulyqtyq terapııanyń qarapaıym tapsyrmalaryn, kúndelik júrgizý nemese medıtasııa túrlerin usyna alady. Mı shabýyly, tyǵyryqtan shyǵýdyń kúndelikti qarapaıym joldaryn nemese stressti jeńildetetin qysqasha keńesterdi jyldam beredi», deıdi ol.
Qandaı jaǵdaı bolmasyn, jaýapty sheshim qabyldaǵanda tek ChatGPT-diń kómegine júginbeı, ár salanyń mamandarynan keńes alý qajet. Qazaqta «Shymshyq soısa da, qasapshy soısyn» degen naqyl bar, ıaǵnı ár isti óz kásibiniń ıesi atqarǵany jón.
