Foto: Erlan Omar/egemen.kz
Ranking.kz málimetinshe, 2026 jyldyń alǵashqy bes aıynyń qorytyndysy boıynsha elimizde paraqorlyqqa qatysty 427 qylmystyq is tirkelgen. Bul ótken jyldyń sáıkes kezeńimen salystyrǵanda 1,7% kóp. Aıta keteıik, taldaý tek úsh bap boıynsha júrgizilgen: «Para alý», «Para berý» jáne «Paraqorlyqqa deldal bolý».
Qańtar-mamyr aılarynda tirkelgen qylmystyq ister sany boıynsha Astana qalasy kósh bastady. Astanada atalǵan baptar boıynsha 56 is tirkelip, ótken jylmen salystyrǵanda kórsetkish 21,7%-ǵa ósken. Sarapshylar muny ortalyq memlekettik organdardyń shoǵyrlanýymen baılanystyrady. Ekinshi orynda – Qostanaı oblysy tur. О́ńirde paraqorlyqqa qatysty ister sany 3,5 ese ósip, 38-ge jetken. Úshinshi orynǵa Almaty qalasy jaıǵasty – munda 32 is tirkelip, ósim 14,3 paıyzdy qurady. Al eń tómen kórsetkish Abaı (1 is), Aqmola (2 is) jáne Batys Qazaqstan (7 is) oblystarynda baıqaldy.
Paraqorlyqqa qatysty qylmystyq ister sanynyń eń joǵary ósimi Almaty oblysynda tirkeldi – kórsetkish bir jylda 4 ese artqan. Sondaı-aq Qyzylorda oblysynda ósim 66,7 paıyzdy, Jambyl oblysynda 61,1 paıyzdy qurady.
Kerisinshe, birqatar óńirlerde mundaı qylmystyq ister sany aıtarlyqtaı azaıǵan. Atap aıtqanda, Soltústik Qazaqstan oblysynda kórsetkish 2,1 ese, Pavlodar oblysynda 2,4 ese, Batys Qazaqstan oblysynda 2,6 ese tómendegen. Al Aqmola oblysynda tirkelgen ister sany ótken jylmen salystyrǵanda 13 ese azaıǵan.
Eske sala keteıik, senatorlar sybaılas jemqorlyqqa qarsy jańa zańdardy qabyldady. Jańa normalarǵa sáıkes, endi memlekettik qyzmetshiler men olarǵa teńestirilgen tulǵalarǵa qyzmettik ókilettikterin jeke múdde úshin paıdalanýǵa qatań tyıym salynady. Eń mańyzdy ózgeristerdiń biri – endi para berýge ýáde etý, usyný nemese talap etý de qylmystyq jaýapkershilikke jatqyzylatyn boldy.
Janbota BAHYTBEK,
EUÝ stýdenti
