Atyraýlyqtar «Taıqazandy» 60-qa jýyq izgi ispen tolyqtyrdy

ATYRAÝ. 30 naýryz. Atyraý oblysynyń jurtshylyǵy «Qazaqstan halqy Assambleıasy – 20 ıgi is» respýblıkalyq estafetasynyń sımvoly «Taıqazandy» qoshemetpen qarsy alyp, kórshiles Batys Qazaqstan oblysynyń delegasııasyna tabystady. Bul týraly egemen.kz tilshisi habarlady. Atyraý oblysy ákiminiń orynbasary Shyńǵys Muqannyń aıtýynsha, «Taıqazan» birneshe kún boıy jańa ıgi isterge tolyqty. Oblysta 60-qa jýyq qaıyrymdylyq sharasy ótip, shamamen 7 mıllıon teńge qarajat jınaldy. Sóıtip, Uly Otan soǵysynyń ardagerleri men qaza tapqandardyń otbasylaryna, az qamtylǵan jáne kóp balaly januıalarǵa áleýmettik kómek berildi. Atalǵan shara senbide Qurmanǵazy atyndaǵy mádenıet úıinde «Sheksiz talant» qaıyrymdylyq konsertimen jalǵasyn tapty. Oǵan óńirdegi etnomádenı birlestikterdiń músheleri, sondaı-aq, múmkindigi shekteýli bolsa da ónerdi janyna serik etken jandar belsene atsalysty. Múmkindigi shekteýli jandarǵa munaıshylar atynan syı-sııapat kórsetildi. «Taıqazan» Qazaqstandaǵy tatýlyq pen birliktiń, yntymaq pen berekeli tirliktiń nasıhatshysyna aınaldy» dedi oblys ákiminiń orynbasary Shyńǵys Muqan. Joldasbek Shópeǵul. Derek: egemen.kz. Sýret: Rahym Qoılybaev.