ASTANA. 30 naýryz. Reseı Qytaıdyń Azııa ınfraqurylymdyq ınvestısııa bankine (AIIB) kirý jónindegi usynysyn qabyldady. Bul týraly nemistiń Deutsche Wirtschafts Nachrichten gazeti habarlady.
«Qytaıdyń bastamasymen qurylǵan jańa uıym Beıjińniń halyqaralyq deńgeıdegi yqpalyn arttyryp, ıýandi halyqaralyq valıýta retinde bekitip alýyna kómektesetin bolady», – delingen basylym habarlamasynda.
«Reseı Qytaıdyń bastamasymen qurylǵan Azııa ınfraqurylymdyq ınvestısııa bankine (AIIB) kirýge sheshim qabyldady», – dep jazdy nemis gazeti. Muny basylym RF birinshi vıse-premeri Igor Shývalovtyń sózine silteme jasap málimdedi. «Biz Qytaı – Eýrazııalyq odaǵy formatyndaǵy yntymaqtastyǵymyzdy aımaqtyq ózara qarym-qatynas sheńberinde odan damytý múmkindiginiń jasalǵanyna qýanyshtymyz, – dedi Reseı ókili. – Eýrazııa ekonomıkalyq odaǵy sheńberinde taýar men kapıtaldyń erkin qozǵalysy «Jibek joly ekonomıkalyq beldeýi» bastamasymen úndesip ketedi».
«Budan buryn bul qurylymǵa kirýge Ulybrıtanııa, Fransııa, Germanııa jáne Shveısarııa kirýge tilek bildirdi», – dep jazady gazet. Qazir Eýroodaq elderi banktiń Eýropadaǵy fılıalynyń óz elderinde ashylýy úshin Qytaıdyń yqylasyna bólený jolynda ózara jarysyp jatyr. AIIB Beıjińge óziniń halyqaralyq aýqymdaǵy yqpalyn arttyra túsýge kómektesetin bolady. Al Qytaıdyń jahandyq yqpal etý saıasaty áskerı is-qımyl sıpatynda emes, belsendi saýda arqyly jasalýǵa negizdelgen. Osy oraı bul el óz valıýtasy – ıýandi AQSh-tyń valıýtasyna balama etýge kúsh salyp jatyr.
«AIIB Búkilálemdik bank pen Halyqaralyq valıýta qoryn básekeles retinde qarastyrady», – dep jazady Deutsche Wirtschafts Nachrichten. Sońǵy jyldary bul uıymdardyń attaryna halyqaralyq deńgeıdegi syn-eskertpeler az aıtylyp júrgen joq. Olarǵa tipti «ózderiniń is-áreketterin AQSh-tyń syrtqy saıasatyna baǵyt ustaıdy» degen de aıyp taǵylýda. Al AQSh AIIB-ǵa qarsy teketireste qazir Japonııanyń ǵana qoldaýyn alyp otyr.
Budan buryn Tokıo Qytaıdyń qandaı da bir bastamasyna qatysa qoımaıtynyn málimdegen bolatyn.
«AQSh pen Qytaı bolsa, birazdan beri Azııa-Tynyq muhıt aımaǵynda ekonomıkalyq jáne saıası ústemdikke jetý jolynda talasyp keledi», - dep atap ótedi nemis basylymy.
Murat Aıtqoja.
Mánbe, sýret: Deutsche Wirtschafts Nachrichten.
