Qazaqstan Respýblıkasynyń Joǵarǵy Soty qyrkúıek aıynda Qazaq handyǵynyń 550 jyldyǵyna oraı «Qazaq quqyǵy men bıler sotynyń tóreligi – qazaq memlekettiliginiń fenomeni» taqyrybynda halyqaralyq ǵylymı konferensııa ótkizýdi josparlap otyr. Aldaǵy basqosý qarsańynda aımaqtyq sharalar bastalyp ta ketti. Mine, sonyń aıǵaǵyndaı, Q.A.Iаsaýı atyndaǵy Halyqaralyq qazaq-túrik ýnıversıtetinde «Esim hannyń eski joly – aýyzsha qaǵıdalar jıyntyǵynyń ozyq úlgileri» taqyrybynda konferensııa bolyp ótti.
Forýmǵa Ońtústik Qazaqstan jáne Jambyl oblystyq sottarynyń tóraǵalary men sýdıalary, ardagerleri, qoǵam qaıratkerleri, tarıhshylar, ádebıetshiler, ǵalymdar, qoǵamdyq birlestikterdiń, BAQ ókilderi qatysty.
Aımaqtyq ǵylymı konferensııada Joǵarǵy Sottyń sýdıasy Baǵlan Maqulbekov sóz sóılep, QR Joǵarǵy Sotynyń Tóraǵasy Qaırat Mámıdiń qatysýshylarǵa arnaǵan quttyqtaýyn oqyp, sońynan «Kıeli jerim, qasıetti elim» taqyrybynda baıandama jasady.
Oblys ákiminiń orynbasary Erlan Aıtahanov quttyqtaý sóz sóıledi.
Qazaqstan Respýblıkasynyń qurmetti sýdıasy, zań ǵylymdarynyń doktory Beket Turǵaraev «Dala danalary bıler ınstıtýtynyń tarıhı mańyzy. Esim hannyń eski joly» baıandamasynda Mońǵolııa memlekettik muraǵattarynda qazaq eliniń zańdarynyń tolyq nusqasy tabylǵanyn aıtty.
Fılologııa ǵylymdarynyń doktorlary Qulbek Ergóbek «Bıler sheshendik pen aqyndyqtyń altyn arqaýy», Mekemtas Myrzahmetov «Dástúrli quqyqtaǵy bı tańdaý joly», OQMPI oqý isi jónindegi prorektory, dosent Barshagúl Isabek «Bılerdiń keler zamandy boljaı bilýi jáne el birligin saqtaýdaǵy ósıetteri» taqyryptarynda súbeli baıandama jasady.
Erterekte babalarymyzdan «Elge baı qut emes, bı qut» degen ataly sóz qalǵan. Rasyn aıtqanda, hannyń ózi bıdiń kesigine turady. Máselen, Jıembet sekildi bı, Buqar sııaqty jyraýlardyń han sheshimine kóńili tolmaǵan jaǵdaıda ótkir sóıleýi sarǵaıǵan tarıh paraqtarynan belgili. Búgingi sot salasynyń qyzmetkerlerine biliktilikpen qatar týralyq, sheshen sóıleı bilý qasıeti de kerek. Konferensııada osy máselege aıryqsha kóńil bólindi.
Jıyndy OQO sotynyń tóraǵasy Nurserik Sháripov qorytyndylap, forýmda tıisti qarar qabyldandy.
Baqtııar TAIJAN,
«Egemen Qazaqstan».
Ońtústik Qazaqstan oblysy.
