Elimizdegi «Nurly Jol» baǵdarlamasynyń aıasynda júzege asyrylyp jatqan kóliktik-logıstıkalyq jobalardyń arqasynda júk tasymaly kólemi 283 mlrd.tonna shaqyrymdy qurap otyr.
Bul jóninde Ortalyq kommýnıkasııalar qyzmetinde ótken baspasóz máslıhatynda Prezıdent janyndaǵy QSZI-diń ǵylymı qyzmetkeri Evgenıı Hon málimdedi. Sondaı-aq, ol Elbasy ótken jylǵy Joldaýynda «Kóliktik-logıstıkalyq ınfraqurylymdardy damytý qajet. Ol makroóńirlerdi habtar qaǵıdaty boıynsha qalyptastyrý aıasynda júzege asyrylatyn bolady. Onyń ústine, ınfraqurylymdyq qańqa Astanamen jáne makroóńirlerdi magıstraldy avtomobıl, temirjol jáne áýe joldarymen shuǵyla qaǵıdaty boıynsha ózara baılanystyrady», degen bolatyn, deı kele elimizdegi atalmysh salaǵa baılanysty birqatar aqparattarmen tanystyrdy.
Onyń aıtýyna qaraǵanda, Statıstıka komıtetiniń aqparaty boıynsha, atalǵan kórsetkish ótken jyly 487 mln.tonna shaqyrym bolǵan kórinedi. Aradaǵy aıyrmashylyqtyń birshama ekendigin atap ótken E.Hon Qazaqstan Qytaı men Eýrazııalyq ekonomıkalyq odaq elderi arasyndaǵy jalpy tranzıttik júk tasymalynyń 1 paıyzyna ıelik etetinin atap ótti. Sonymen qatar, ol sarapshylardyń boljaýy boıynsha, Qytaı men Eýroodaq arasyndaǵy saýda kólemi 2020 jyldarǵa qaraı 781 mıllıard dollarǵa artýy múmkin ekendigin kóldeneń tartty. Jáne de Evgenıı Honnyń aıtýy boıynsha, búgingi tańda basymdyqqa ıe bolyp otyrǵan temirjol jáne avtomobıl dálizderiniń damýy da aıtarlyqtaı mańyzǵa ıe. Onyń sebebin bizdiń memleketten 5 iri halyqaralyq kólik dálizderiniń ótetindigimen baılanystyra kele, Úkimet tarapynan júzege asyrylǵan birqatar jobalardy atap aıtty. Olardyń qataryna «Jetigen – Qorǵas», «О́zen – Túrikmenstan memlekettik shekarasy» kiretindigin jetkizdi. Al bıylǵy jyly «Jezqazǵan – Beıneý» jáne «Arqalyq – Shubarkól» jelileri paıdalanýǵa berilgendigin atap ótti. Elmıra MÁTIBAEVA, «Egemen Qazaqstan».
