Máskeýden kelip, qazaqsha kitap oqyǵan

Búgingi jahandaný dáýirinde úlken-kishi «sıqyrly sandyqqa» úńilip, jer-jahandaǵy jańalyqtardy bilýde. Munyń jaqsylyǵy kóp bolǵanymen, keri áseri tıip jatqan tustar da joq emes. О́ıtkeni, búginde jurt kitapty óte sırek oqıdy. Kitaphanadaǵy oqyrmandardyń tizimine kóz jiberseń, mektep oqýshylary, bala-shaǵa... Biraq, osy úderisti teriske shyǵaratyn jaıttyń de kýási boldyq. Máskeý qalasynyń turǵyny Nadejda Holopova jaz aıynda Qaztalov aýylynda turatyn anasy Valıa apaıǵa qydyryp kelgende, birin­shi ­baratyn jeri – aýdandyq ki­tap­hana eken. Az ǵana sheginis. Nadejda Holopova Qaztalov aýylynyń baıyrǵy turǵyny, kóp jyl ­us­tazdyq qyzmet ja­saǵan Vla­dı­mır Holopovtyń kelini eken. Al Nadejdanyń anasy Valıa apaı búginde Qaztalov aýylynda baqýatty turmys keshýde. Valıa apaımen sóılese qalsańyz, qazaqshasymen qazaqtardy «súrindiredi». Al Nadejda óziniń 7 jasar qyzy Vıktorııamen jaz aıynda kelgende kitaphanada bolýdy daǵdyǵa aınaldyrǵan. Maqsaty – qazaq tilindegi kitaptardy qyzyna oqytyp tanystyrý eken. Al ózi qazaqsha erkin oqyp, erkin sóıleıdi. Nadejdany áńgimege tart­qanda, ol: «Men osy aýylda týyp-óstim. Qazir Máskeý qalasynda turamyn. Jastaıymnan qazaq tiliniń nárimen sýsyndadym. О́te sulý da baı til. Qazirgi kúnde Máskeýde bul tildiń ortasy bolmaǵan soń jubaıym Kolıa ekeýmiz tildi saǵynǵanda úıde qazaqsha da sóılesip alamyz. Al anam Valıa­ǵa jazda qydyryp kelgende qazaq tilinde sóılep, bir jasap qalamyn. Qyzym Vıktorııany ata-anasynyń kindik qany tamǵan eldiń tilin, ádet-ǵurpyn, salt-dástúrin bilsin dep ádeıi kitaphanaǵa jyl saıyn alyp kelemin. ...Aıtpaqshy, jastyq sha­ǵymyz, Kolıamen alǵashqy kez­desýdegi mahabbat týraly sózder qazaq tilinde aıtylyp edi», – dep kúlip qoıdy Nadejda apaı. Mine, osyndaı ana tilimizdi qadirlegen, tek qadirlep qana qoımaı, qyzyn da úıretip júrgen Nadejdadan úlgi alýǵa ábden bolady. Juldyz ASQARQYZY. Batys Qazaqstan oblysy, Qaztalov aýdany.