Fýtbol. Eýropa lıgasynda Qazaqstan tóreshileri de qazylyq jasaıdy

ASTANA. 1 shilde. Qazaqstannyń fýtbol tóreshileri Eýropa lıgasynyń irikteý kezeńinde qazylyq etedi. Bul týraly Qazaqstan fýtbol federasııasynyń baspasóz qyzmeti habarlady. Erteń atalǵan týrnırdiń birinshi irikteý kezeńi bastalady. Osy synda «Saksan» (Moldova) men «Apollon Lımassol» (Kıpr) komandalary arasyndaǵy oıynda Qazaqstan qazylary qyzmet kórsetedi. Naqty aıtsaq, Moldova astanasy – Kıshınev qalasynda ótetin matchta taldyqorǵandyq Denıs Izmaılov bas tóreshi bolyp taǵaıyndaldy. Al onyń qaptaldaǵy kómekshileri – Evgenıı Belskıı (Taraz) jáne Anatolıı Hodın (Atyraý). Tórtinshi tóreshi – qaraǵandylyq Artem Kýchın. Denıs Izmaılov ótken maýsymda da Eýropa lıgasy irikteý týrnıriniń matchynda qyzmet atqarǵan edi. Sonymen qatar, toptyq kezeńde Artem Kýchınniń jetekshiligimen «Iаng Boız» (Shveısarııa) – «Slovan» (Slovakııa) matchynda jumys istedi. Bul oıynda Izmaılov tóreshiniń qosymsha kómekshisi boldy. Aıta keteıik, bul synda elimizdiń namysyn úsh birdeı komanda qorǵaıdy. Shymkenttiń «Ordabasy» komandasy óz alańynda Izraıldiń «Beıtaryn» qabyldaıdy. Atalǵan match Astana ýaqyty boıynsha 18:00-de bastalady. Sonymen qatar Aqtóbede «Aqtóbe» – «Kalıý» (Estonııa) oıyny ótedi. Bul kezdesý saǵat 22:00-ge josparlanǵan. Úshinshi komanda – Almatynyń «Qaıraty» syrt alańda «Srvena Zvezdamen» (Serbııa) kúsh synasady. Bul oıyn Astana ýaqytymen 3 shilde kúni saǵat 00:45-te bastalady. Elaman Qońyr. Derek, sýret: Qazaqstan fýtbol federasııasynyń baspasóz qyzmeti.