ASTANA. 14 qazan. Ońtústik Koreıanyń Mýngıon qalasynda VI Dúnıejúzilik armııa oıyndary aıaqtaldy. Bul týraly egemen.kz tilshisi habarlady.
Jarystyń qorytyndysy boıynsha Qazaqstan Qarýly Kúshteriniń qurama komandasy 130 qatysýshy eldiń arasynan 12-oryndy ıelenip, armııa oıyndarynyń myqty komandalarynyń qataryna kirdi.
Jalpy eseppen alǵanda komandamyzdyń qorjynynda 13 medal, ıaǵnı, 4 altyn, 3 kúmis jáne 6 qola medal bar.
Joǵary dárejedegi marapattardy elimizge 64 kılo salmaqta óner kórsetken bylǵary qolǵap sheberleri, qatardaǵy jaýynger Eldos Sarqulov pen 69 kıloǵa deıingi salmaqtaǵy AOSK-nyń qyzmetkeri Aslanbek Shymbergenov, taekvondoshy qatardaǵy jaýynger Nursultan Mamaev pen erkin stıldegi balýan AOSK-nyń qyzmetkeri Meırambek Aınaǵulov ákeldi.
Kúmis medaldaryn 57 kıloǵa deıingi salmaqta QR sport sheberi, erkin kúresten álem chempıonattarynyń júldegeri AOSK-nyń qyzmetkeri Vladımır Kýdrın, arqamen 100 metr qashyqtyqqa júzýde kishi serjant Aleksandr Tarabrın jáne 91 kıloǵa deıingi salmaqtaǵy bylǵary qolǵap sheberi AOSK-nyń qyzmetkeri Kámshibek Kúnkabaev qanjyǵalaryna baılady.
Armııa oıyndarynda qola medaldi 74 kıloǵa deıingi salmaqta erkin stıldegi balýandar álem chempıony kishi serjant Ǵalymjan Úserbaev, 65 kıloǵa deıingi salmaqta álem chempıonatynyń júldegeri efreıtor Azamat Shaǵapuly, 61 kılo salmaqta Qazaqstannyń chempıony, áskerı qyzmetshiler arasyndaǵy 2014 jylǵy álem chempıonatynyń kúmis júldegeri efreıtor Eldos Ábikenov, kishi serjant Ádilet Daýlymbaev, sondaı-aq 49 kılo salmaqta AOSK-nyń boksshylary, qyzmetkerleri Jomart Erjan pen 60 kıloǵa deıingi salmaqta Jaqsylyq Ilııasov jeńip aldy.
VI Dúnıejúzilik armııa oıyndary 1 men 11 qazan aralyǵynda Armııa sportynyń Dúnıejúzilik Keńesi (CISM) sheńberinde ótkenin esterińizge sala keteıik. Ol 4 jylda bir ret ótkiziledi jáne aýqymy boıynsha Olımpııalyq oıyndarmen salystyrýǵa bolady.
Bıylǵy jyly álemniń 130 elinen bas qosqan 8 500 sportshy oıynǵa qatysty. Elimizdiń namysyn QR QK Bas shtaby bastyǵynyń orynbasary, general-maıor Muqan Dúısekeevtiń basshylyq etýimen Armııa ortalyq sport klýbynyń 58 sportshysynan quralǵan Qarýly Kúshterdiń quramasy qorǵady. Sportshylar sporttyń 11 túrinen óner kórsetti. Atap aıtsaq, erkin jáne grek-rım kúresi, sporttyq baǵdarlaý, dzıýdo, júzý, oq atý, zamanaýı bessaıys, áskerı bessaıys, taekvondo, jeńil atletıka jáne boks.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.
