«Qazposhta» Konstıtýsııaǵa arnap merekelik marka shyǵardy

«Qazposhta» AQ Qazaqstan Respýblıkasy Konstıtýsııasynyń 20 jyldyǵyna arnalǵan markany poshtalyq aınalymǵa shyǵardy. Aıtýly sharaǵa oraı, uıymdastyrylǵan markany bastyrý saltanatyna Konstıtýsııalyq Keńes tóraǵasy Igor Rogov pen «Qazposhta» AQ basqarma tóraǵasy Baǵdat Mýsın qatysty. – Ilýde bir oryn alatyn, óte sırek uıymdastyrylatyn mundaı sharalardyń ózindik mán-mańyzyna oraı, bul tarıhı oqıǵalardyń biri. Sondyqtan da, ataýly kúnde arnaıy marka basyp shyǵarý isi bizdiń Konstıtýsııamyzdyń qundylyǵyn odan saıyn arttyra túsedi. Ata Zańymyzdyń abyroı-bedelin bildiretin merekelik marka fılatelıımen aınalysýshylar arasynda (marka jınaýshylar) zor suranys týdyryp, tarıh qoınaýynan ózine tıesili tuǵyrly ornyn alady degen senimdemin, – dedi Konstıtýsııalyq Keńes tóraǵasy. Osylaısha, júrekjardy lebizin bildirgen Igor Ivanovıch ataýly kúnge arnaıy marka shyǵarýǵa múddelilik tanytqan «Qazposhta» AQ basqarma tóraǵasy Baǵdat Mýsınge sheksiz alǵysyn aıtyp, estelik syı retinde Qazaqstan Respýblıkasy Konstıtýsııasynyń áshekeılengen sýretti basylymyn tartý etti. О́z kezeginde sóz alǵan «Qaz­poshta» AQ tóraǵasy mar­kanyń «Estelik jáne mereı­toı­lyq datalar» serııasynda shyǵa­ryl­ǵandyǵyn atap ótti. Tórt boıaý­ly ofsetti baspa perforasııa­sy jotaly bolyp keledi.  Al shyǵarylym túri markaly paraq. О́lshemi – 130h108 mıllımetrlik poshtalyq markanyń nomınaly – «A» lıterli, quny – 112 teńge. Bul zańdy tulǵalarǵa arnal­ǵan Qazaqstan Respýblıkasy aýma­ǵynda jer ústi kóligimen 20 gramǵa deıingi salmaqta qarapaıym hatty jiberý tarıfine sáıkes keledi. Taralymy – 5000 dana,  dedi Baǵdat Batyrbekuly. Aıta keteıik, merekelik mar­kanyń sýretin Qýat Ibraıshın salǵan bolsa, ony basyp shyǵarǵan orny Qazaqstan Respýblıkasy Ulttyq bankiniń «Banknot fabrıkasy» respýblıkalyq kásiporny bolyp tabylady. Nurlybek DOSYBAI, jýrnalıst.