ASTANA. 14 qazan. Qazaqstan Respýblıkasy Qorǵanys mınıstrliginde vedomstvo basshysy Imanǵalı Tasmagambetov pen QHR Qorǵanys mınıstri general-polkovnık Chan Vansıýanniń kezdesýi ótti. Bul týraly egemen.kz tilshisi habarlady.
Kezdesý qorytyndysy boıynsha Qazaqstan Respýblıkasynyń Qarýly Kúshterine aqysyz negizde tehnıkalyq kómek kórsetý týraly QR jáne Qytaı arasyndaǵy kelisimge qol qoıyldy.
Sonymen qatar, Qorǵanys mınıstri Imanǵalı Tasmaǵambetov qytaı ókilderin Astana qalasynda 2016 jyldyń maýsymynda ótetin «KADEKS-2016» áskerı tehnıka men qarý-jaraqtyń halyqaralyq kórmesine qatysýǵa shaqyrdy.
«Qytaı qorǵanys ónerkásibi kesheniniń ekspozısııasy joǵary deńgeıde usynylady dep úmittenemin. Bul bizdiń áskerı-tehnıkalyq yntymaqtastyǵymyzǵa qosymsha serpin beredi», dedi qorǵanys vedomstvosynyń basshysy.
О́zara is-qımyl jasaýdyń mańyzdy aspektisi birlesip daıyndalý jáne assımetrııalyq qaýip-qaterlerge (arnaıy maqsattaǵy bólimshelerdi daıyndaý) qarsy is-qımyl jónindegi áleýetti arttyrý aıasynda tájirıbe almasý bolyp tabylady. Qazaqstan taýly daıarlyq, jaýyngerlik júzýshilerdi daıyndaý, qarýly kúshter arnaıy bólimsheleriniń qalalyq jaǵdaılardaǵy áreket etýi boıynsha birlesken is-sharalardy uıymdastyrýǵa múddeli. Jaqyn arada Qytaı men Qazaqstannyń aýmaǵynda birlesken rotalyq-taktıkalyq lańkestikke qarsy oqý-jattyǵýynyń ótýi josparlanýda.
Odan basqa, eki eldiń ózara is-qımylynda áskerı bilim berý salasy mańyzdy ról atqarady. Búgingi tańda qazaqstandyq áskerı qyzmetshiler Qytaıdyń ult-azattyq armııasynyń áskerı joǵary oqý oryndarynda bilim alýda. QR-nyń áskerı qyzmetshileri Qytaı armııasynyń túrlik (ÁÁK, ÁTK jáne QÁ) akademııalarynda, sondaı-aq ártúrli mamandyqtar boıynsha daıarlaý kýrstarynda bilim nárimen sýsyndaýda.
Dastan Kenjalın.
Derek, sýret: Qazaqstan Respýblıkasy Qorǵanys mınıstrligi.
