Mýzeı jumystary jańǵyrtylmaq

Keshe Astana qalasynda Qazaqstan Respýblıkasy Pre­zı­denti janyndaǵy Ortalyq kommýnıkasııalar qyzmetinde «Qazaqstan mýzeıleriniń jumysyn jańǵyrtý týraly» degen taqyrypta baspasóz konferensııasy ótken bolatyn.  Bul baǵytta júrgizilip otyrǵan jumystar týraly Mádenıet jáne sport vıse-mınıstri Ǵ.Ahmedıarov, elordadaǵy Ulttyq mýzeıdiń dırektory D.Myńbaı, Almatydaǵy Ortalyq memlekettik mýzeıdiń dırektory N.Álimbaı, Sh.Ýálıhanov atyndaǵy Tarıh jáne etnologııa ınstıtýtynyń dırektory H.Ábjanov baıandady. Mýzeılerdiń zańnamalyq bazasyn jetildirý, mýzeı isinde qoljetimdilikti arttyrý, zamanaýı IT-tehnologııa ónimderin engizý, ǵylymı-zertteýlerdi jetildirý, sonymen qatar, jeke kolleksııa jııýshylarmen baılanys jasaý, t.b. ortaǵa salyndy. Jıyn barysynda vıse-mınıstr Ǵ.Ahmedıarov, Prezıdent N.Nazarbaevtyń jahandyq jáne ishki syn-qaterlerge jaýap beretin, sonymen bir mezgilde, jańa tarıhı jaǵdaılarda elimizdi úzdik otyzdyqqa aparatyn «Bes ınstıtýttyq reforma – 100 naqty qadam» Ult jos­paryn jarııalaǵanyn tilge tıek etip, atalǵan ult josparynyń «Birtektilik pen birlik» baǵyty boıynsha ústimizdegi jyly shildede Qazaqstan Respýblıkasynyń Premer-Mınıstriniń tóraǵalyǵymen jańǵyrtý jónindegi Ulttyq komıssııa otyrysy ótkenin, naqty tapsyrmalar berilgenin atady. Sondaı tapsyrmalardyń biri, «Birtektilik pen birlik» ınstıtýttyq reformasynyń 86-shy qadamy Qazaqstan halqy Assambleıasynyń «Úlken el» – Úlken otbasy» keń kólemdi jobasyn ázirleý jáne júzege asyrý bolyp tabylatynyn osy jobanyń aıasynda qazirgi ýaqytta el mýzeıleriniń jumysyn jańǵyrtý jóninde jumystar júrgizilip jatqanyn naqty mysaldarmen alǵa tartty. Mysaly, Ulybrıtanııada barlyq mýzeıler men kitaphanalardy biriktiretin National Arts Council (О́ner ulttyq keńesi) jumysy jolǵa qoıylǵanyn bireý bilse, biri bilmeıdi. Sondaı ıgi qadamǵa barý úshin. Ulttyq mýzeı janynan mýzeıler men mýzeı qyzmetkerleriniń Ulttyq keńesi assosıasııasyn qurý jospary talqylandy. Konferensııaǵa qatysqandar bıylǵy jyly Abaıdyń «Jıdebaı – Bórili» memlekettik tarıhı-mádenı jáne ádebı-memorıaldy qoryq-murajaıynyń aýmaǵynda qonaq úıi men ashanasy, konferens-zaly bar tarıhı-mádenı týrıstik keshen, sondaı-aq «Tańbaly» qoryq-murajaıynda qurylatyn vızıt ortalyqtyń jobasy jasaqtalǵanyn da eske saldy. Raýan QAIDAR, «Egemen Qazaqstan».