Álemdik jarysta baq synaıdy

Enactus Kazakhstan EXPO-2015 júzege asyrylǵan bıznes-jobasy ulttyq kýbogynyń jeńimpazy – Qazaq gýmanıtarlyq zań ýnıversıtetiniń komandasy 14-16 qazan kúnderi OAR-dyń Iohannesbýrg qalasynda ótetin bedeldi halyqaralyq konkýrsta álemniń 36 memleketinen kelgen stýdenttermen jarysqa túsedi jáne EKSPO-2017-iniń tusaýkeserin ótkizedi.  Álemniń jetekshi kompanııalary adamdardyń ómir súrý deńgeıin jaqsartý jáne progress quraly retinde kásipkerlikti qoldanatyn talantty jastarǵa qoldaý kórsetedi. Enactus (burynǵy SIFE – Students In Free Enterprise) halyqaralyq baǵdarlamasy áleýmettik jobalar jáne jastar kásipkerligi salasynda tıimdi qarym-qatynas jasaý úshin jastar kóshbasshylaryn, jetekshi bıznesmenderdi jáne belsendi oqytýshylardy biriktiredi. Tájirıbe júzinde JOO-da alǵan teorııalyq bilimderin paıdalana otyryp, stýdentter kásipkerlik sheberligin ıgeredi, kóshbasshylyq qabiletterin damytady, bıznes etıkasynyń negizderin ıgerip, qoǵamnyń jaýapty azamattary bolýdy úırenedi. Otandyq jetekshi kásipkerler jáne sheteldik kompanııalar jyl saıyn elimizdiń 49 ýnıversıtetindegi Enactus belsendileri men stýdentteri jumystarynyń jobalarymen tanysyp baǵalaıdy. Bul joba Memleket basshysynyń qazaqstandyq jastardyń básekege qabilettiligin arttyrý jáne olardyń otandyq bıznesti damytýǵa qatysýyn keńeıtý jónindegi mindetin is júzine asyrýǵa baǵyttalǵan. Enactus Kazakhstan dırektorlar keńesiniń tóraǵasy, Paimbek kompanııasynyń basshysy Raıymbek Battalov: «Enactus sheńberinde jumys isteıtin tárbıeshilik ınstıtýty is basyndaǵy bıznes jetekshileriniń baı tájirıbesin jastarǵa berýge múmkindik týǵyzady. Álemniń 60 myńnan astam stýdentteri tıimdi bıznes úlgilerdi jáne kásipkerlik qadamdardy qoldana otyryp, Enactus jobasyn is júzine asyrýda», dep atap kórsetedi. Áleýmettik ekonomıkalyq jáne ekologııalyq faktorlardy eskere otyryp, jastar áleýmettik jaǵynan az qamtamasyz etilgen turǵyndardy bilimmen jáne iskerlikpen qarýlandyrý arqyly olardyń turmys dárejesin kóterýge kúsh salýda. Joba qyzmetiniń sheńberinde stýdentter óz kásiporyndaryn qurady jáne kásipkerlik negizderine úırete otyryp basqalaryna kómek kórsetedi. «Álemdik statıstıkaǵa sáıkes Enactus jobasynyń túlekteri halyqaralyq bıznes salasynda kásipkerlikte jáne menedjmentte joǵary jetistikterge qol jetkizedi: olardyń 80 paıyzy iri kompanııalarǵa qyzmetke ornalasady, 20 paıyzy óz bıznesin ashady», deıdi Enactus Kazakhstan prezıdenti Albına Erjanova. Jylqybaı JAǴYPARULY, «Egemen Qazaqstan».