ASTANA. Qytaıdyń Taıpeı avtonomııalyq Respýblıkasynyń Taıýan qalasynda uıymdastyrylǵan Azııa-Tynyq muhıt oıyndary aıaqtaldy. Bul týraly «Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń» baspasóz qyzmetkeri Tólegen Jákitaıuly habarlady.
Álemniń 33 memleketinen barǵan sýrdoshylar arasynda qazaqstandyqtar segizinshi orynǵa taban tiredi. Utqan júlde sany 12 medalǵa jetti.
«Segizinshi ret tý kótergen sýrdlımpıadashylardyń saıysyndaǵy bizdiń sportshylarymyzdyń kórsetken ónerleri osal bolǵan joq. Ásirese, alǵashqy kúnderi taekvandoshylar men jeńil atletshiler, sońynan júzýshiler júldelerdi ýystap alyp shyqty. Bul saparda tek badmınton, fýtbol, ústel tennısiniń sportshylary oljasyz qaıtty. Utqan júldelerdiń uzyn sany 12 medal. Tarata aıtsaq, 1 altyn, 6 kúmis, 5 qola medal», dedi Tólegen Jákitaıuly.
Onyń aıtýynsha, tórt jylda bir ret ótkiziletin Azııa-Tynyq muhıt oıyndarynan Qazaqstan sýrdlımpıadashylarynyń eń qomaqty oralǵany osy joly boldy. Tarıhqa kóz júgirtsek, 1996 jyly Malaızııada uıymdastyrylǵan bul básekege qazaqstandyq sportshylar tuńǵysh ret qatysyp, 1 kúmis, 4 qola medalmen oralypty. 2000 jylǵy Azııa-Tynyq muhıt oıyndary dál bıylǵydaı Qytaıdyń Taıpeı óńirinde ótken. Qazaqstan sýrdoshylar Taıpeıden bar-joǵy 2 qola medal utqan kórinedi. Sodan belgisiz sebeptermen, tek 2012 jyly Ońtústik Koreıada bolǵan Azııa-Tynyq muhıt oıyndaryna ǵana qatysqan qazaqstandyqtar tuńǵysh ret osy dodanyń altyn medalyna qol jetkizgen. Oǵan qosa 2 kúmis, 5 qola medal, barlyǵy 8 júldeni ýystap qaıtady.
«Endi mine, araǵa 15 jyl salyp Qytaıdyń Taıpeı óńirindegi Azııa-Tynyq muhıt oıyndaryna taǵy qatysqan bizdiń sýrdoshylarymyz ótkenniń esesin toltyryp qaıtqandaı boldy. Alǵashqyda osy Taıpeıden tek 2 qola medal ǵana alsa, osy joly altyn bastaǵan 12 medaldy oljalady. Sýrdlımpıadashylarymyzǵa «Júlde qutty bolsyn!» deımiz», deıdi ol.
Azııa-Tynyq muhıt oıyndarynyń bas júldesin 31 altyn, 32 kúmis,25 qola medal utqan japondyqtar talassyz ıemdendi. Ekinshi oryn 29 altyn, 19 kúmis, 25 qola medalǵa qol jetkizgen Taıpeı avtonomııalyq respýblıkasyna buıyrdy. Al, úshinshi oryndy 19 altyn, 18 kúmis, 15 qola medalmen shektelgen Qytaı sýrdlımpıadashylary aldy.
Bul tizimde Qazaqstan sportshylary 1 altyn, 6 kúmis, 5 qola medalmen segizinshi orynnan kórindi.
Dastan Kenjalın.
Derek, sýret: egemen.kz
Sýrette parataekvandodan 68 kılo salmaqta kúmis júldeni jeńip alǵan Tımýr Kýlesov.
