Qyzylordada ulttyq sport túrlerinen respýblıkalyq festıval bastaldy

QYZYLORDA. 15 qazan. Qyzylorda qalasynda Qazaq handyǵynyń 550 jyldyǵyna jáne Qazaqstan halqy assambleıasynyń 20 jyldyǵyna arnalǵan ulttyq sport túrlerinen Qazaqstan Respýblıkasynyń IV festıvali ótip jatyr. 20 qazanǵa deıin jalǵasatyn saıysqa Astana, Almaty qalalary men barlyq oblystardan 2000-ǵa jýyq sportshy qatysýda. Bul týraly egemen.kz tilshisi habarlady. Tórt jylda bir uıymdastyrylatyn festıval baǵdarlamasynda báıge, qazaq kúresi, kókpar, aýdaryspaq, teńge ilý, qyz qýý, toǵyzqumalaq, asyq atý, qusbegilik, jamby atý, jekpe-jek sekildi sporttyń 13 túrinen jarystar bolady. Bul týraly búgin «Syr medıa» JShS janyndaǵy oblystyq kommýnıkasııa ortalyǵynda ótken brıfıng barysynda oblystyq dene shynyqtyrý jáne sport basqarmasynyń basshysy Sadyq Mustafaev málimdedi. Sondaı-aq, jıynǵa oıyndardyń bas tóreshisiniń orynbasary Seıdolla Jeńisuly, Mádenıet jáne sport mınıstrliginiń ulttyq sport túrleri basqarmasynyń basshysy Maqsat Qoıshybaev, Ulttyq sport túrleri qaýymdastyǵynyń atqarýshy dırektory Erlen Ospanov qatysty. Elimizde ulttyq sport túrlerin damytý, salaýatty ómir saltyn qalyptastyrý, jastardy otansúıgishtikke jáne halyqtar arasynda dostyq pen tatýlyqty nyǵaıtý, eń bastysy ulttyq sport túrlerin damytýdaǵy eń myqty óńirdi anyqtaý maqsatynda ótkizilip jatqan festıvaldiń resmı ashylýy 16 qazan kúni saǵat 17.00-de ortalyq stadıonda ótedi. Sporttyq sharalar Ǵanı Muratbaev atyndaǵy ortalyq stadıonda, «Eýrazııa» sport kesheninde, «Muz aıdyny» jáne «Nursát» tennıs ortalyǵynda ótedi. Erjan Baıtiles. Derek, sýret: egemen.kz.