Memleket basshysy Reseı prezıdentimen kezdesti

ASTANA. 15 qazan. Elbasy Qazaqstanǵa memlekettik saparmen kelgen Reseı Federasııasynyń prezıdenti Vladımır Pýtınmen kezdesti. Bul týraly akorda.kz habarlady. Qazaqstan Prezıdenti kezdesý barysynda V.Pýtınniń elimizge sapary úshin rızashylyq bildirdi. «Sizdiń Qazaqstanǵa budan burynǵy memlekettik saparyńyz tórt jyl buryn boldy. Osy ýaqyt aralyǵynda biz únemi ekijaqty qarym-qatynastyń ózekti máselelerin túrli oryndarda sheship otyrdyq. Sizdiń bul jolǵy saparyńyz da osynaý kúrdeli kezeńdegi yntymaqtastyǵymyzdy nyǵaıtýǵa jáne tereńdete túsýge septigin tıgizetinine senimdimin», – dedi Nursultan Nazarbaev. Memleket basshysy 16 qazanda ótetin TMD-ǵa múshe memleketter basshylary keńesi men Joǵary Eýrazııalyq ekonomıkalyq keńes aıasyndaǵy kelissóz máselelerin de qozǵady. «Búginde EAEO halyqaralyq arenada qurmet pen bedelge ıe bolyp, óz aıasyn keńeıtip keledi. Biz durys jolda kelemiz dep esepteımin», – dedi Qazaqstan Prezıdenti. Nursultan Nazarbaev Qazaqstan men Reseıdiń ekijaqty qarym-qatynasyn damytý keleshegi týraly da aıtty. «Biz Sochıde ózara qarym-qatynastarymyzǵa qatysty negizgi máselelerdi talqylaýǵa múmkindik aldyq, endi búgin solarǵa qatysty tıisti qujattar daıyndalyp otyr. Bizdiń qarym-qatynastarymyz «HHI ǵasyrdaǵy tatý kórshilik jáne odaqtastyq týraly» irgeli kelisim negizinde damyp jatqanyn da aıtqym keledi. Odaqtastyq Ujymdyq qaýipsizdik týraly shartpen, al ekonomıkalyq turǵydan EAEO-nyń jarǵylyq qujattarymen bekitilgen. Qazaqstan árdaıym Reseı Federasııasynyń jaqyn ári senimdi kórshisi, odaqtasy bolǵan, aldaǵy ýaqytta da solaı bolyp qala beredi. Bul Qazaqstan halqynyń túpki múddelerimen toǵysyp jatyr», – dep atap ótti Memleket basshysy. V.Pýtın óz sózinde joǵary deńgeıdegi kezdesýler men kelissózder júıeli túrde júrgizilip kele jatqanyn atap ótti. «Meniń Reseı-Qazaqstan qarym-qatynasyna sıpattama berýimniń keregi joq. Bul – jaı ózara senimdi seriktestik qana emes, tolyq maǵynasyndaǵy odaqtastyq qarym-qatynas. Qazaqstan – bizdiń iri saýda-ekonomıkalyq seriktesimizdiń biri. Búginde 6 myńǵa jýyq Reseı kompanııalary Qazaqstanda jumys istep jatyr, dollarlyq ekvıvalentpen eseptegende mol kólemdegi ınvestısııa jınaqtaldy. Sizdiń tól bastamańyz – Eýrazııalyq ekonomıkalyq odaq belsene damyp, ekonomıkalarymyzdyń tıimdi damýyna jaǵdaı týǵyzýda. Biz kóptegen seriktesterimiz EAEO-men túrli formatta yntymaqtasý nıetinde ekenin kórip otyrmyz», – dedi Reseı prezıdenti. Aıdar О́risbaev. Derek, sýret: akorda.kz.