Qazaqstan men Reseı prezıdentteri jýrnalısterge arnap brıfıng ótkizdi

ASTANA. 15 qazan. Qazaqstan men Reseı prezıdentteri kelissózderniń qorytyndysyna arnalǵan birlesken brıfıng ótti. Bul týraly akorda.kz habarlady. Memleket basshysy brıfıng barysynda Reseı prezıdenti sapary mártebesiniń bıiktigi eki el qarym-qatynasynyń erekshe sıpatyn aıǵaqtaıtynyn atap ótti. «Qazaqstan men Reseıdiń arasynda ózara is-qımyldyń, dostyq pen yntymaqtastyqtyń ilgeriden kele jatqan jáne naǵyz tabysty tájirıbesi qalyptasqan. Bizdiń árbir kezdesýimiz birlesken jobalardy júzege asyrý jónindegi naqty ýaǵdalastyqtarǵa, yntymaqtastyqtyń ózara tıimdi shartqa negizdelgen jańa baǵyttaryn aıqyndaý máselelerine arnalady», – dep atap ótti Nursultan Nazarbaev. Qazaqstan Prezıdenti qazirgi kúrdeli ahýaldy eskere otyryp, kelissózderde ekonomıkada úılesimdi is-qımyldar júrgizý máselesi basty taqyryp bolǵanyna nazar aýdardy. «Bul úshin bizde ekijaqty formatta da, Eýrazııalyq ekonomıkalyq odaq aıasynda da qajetti nárseniń bári bar. EAEO-ny qurýdyń ózi elderimiz úshin mańyzy zor ıgi qadam bolyp sanalady. Qazaqstannyń ónim óndirýshileri EAEO-ǵa múshe elderdiń aýqymdy naryǵyna shekteýsiz qol jetkizdi. Endi osy naryqta ornyǵý úshin taýar men jumys jáne qyzmet kórsetýdiń básekege qabilettiligin arttyrý kerek», – dedi Memleket basshysy. Nursultan Nazarbaev kelissózder kezinde álemdik ekonomıkadaǵy túıtkilderdiń saldaryn jeńildetý úshin birqatar naqty sharalar belgilengenin aıtty. «Bul – Reseıdiń gazy men munaıyn Qazaqstan arqyly Qytaıǵa tranzıtteý, Kaspııdegi «Sentralnoe» jáne «Hvalynskoe» kenishterin birlesip ıgerý, kómir ónerkásibi salasynda yntymaqtasý, tranzıt úshin Kaspıı teńiziniń boıymen Parsy shyǵanaǵyna shyǵatyn jańa joldy paıdalaný jaıyn pysyqtaý máselesi. Biz «Batys Eýropa – Batys Qytaı» jobasynyń aıaqtalýy, sondaı-aq ınfraqurylymdyq saladaǵy yntymaqtastyq týraly arnaıy sóılestik. Osy baǵyttardaǵy seriktestikti damytý úshin zor áleýetimiz bar», – dedi Qazaqstan Prezıdenti. Memleket basshysy eki eldiń saýda-ekonomıka salasyndaǵy ózara is-qımylynyń keleshegine bólek toqtalyp ótti. «Reseı Qazaqstannyń saýda salasyndaǵy dástúrli iri seriktesi bolyp sanalady. О́zara taýar aınalymynyń ortasha jyldyq kólemi shamamen 21 mıllıard dollardy quraıdy. Reseı kompanııalary Qazaqstannyń iri kómirsýtek shıkizaty kenishterin ıgerýge qatysýda. Qazaqstanda reseılik kapıtaldyń qatysy bar 5600-den astam kásiporyn jumys júrgizýde. Búginde Qazaqstannyń Indýstrııalandyrý kartasy aıasynda qazirdiń ózinde birlesken 20 iri ınvestısııalyq joba iske asyryldy, 4-i atqarylyp jatyr, taǵy 3-i bolashaqta qarastyrylmaq», – dedi Nursultan Nazarbaev. Is-shara barysynda sondaı-aq kún tártibindegi ózekti halyqaralyq máselelerge qatysty Qazaqstan men Reseıdiń ustanymdary aıtyldy. «Biz Mınsk ýaǵdalastyqtarynyń júzege asyrylý barysyn, jahandyq jáne óńirlik uıymdar aıasyndaǵy yqpaldastyq aıasyn, ásirese Ortalyq Azııa óńirindegi turaqtylyq pen qaýipsizdik maqsatynda keńeıtý máselelerin talqyladyq. Bul rette Aýǵanstandaǵy, Sırııa men Iraktaǵy ahýaldyń máni zor.  Biz Vladımır Vladımırovıchpen osy óńirde qalyptasqan jaǵdaıdy talqyladyq. Búginde shııtter men men súnnıtter arasyndaǵy teketiresti óz maqsatyna paıdalaný belsendi júrýde. Alaıda, bul áńgimeler shyndyqqa esh janaspaıdy. Sırııada bolyp jatqan jaıt – bizdiń bárimiz úshin, ásirese Ortalyq Azııa óńiri úshin ortaq qater. Osyǵan baılanysty biz «Islam terrorızmge qarsy» forýmyn ótkizý ıdeıasyn usynyp otyrmyz», – dedi Qazaqstan Prezıdenti. Qazaqstan men Reseıdiń álemdegi ahýaldyń óristeýine jáne ony baǵalaýǵa qatysty kózqarastary ortaq ekeni, eki eldiń halyqaralyq máselelerdi sheshý jónindegi qadamdarynyń tyǵyz úılesimdiligi, bul máseleler boıynsha pikir almasýlar muny taǵy da dáleldegeni atap ótildi. Sońynda Nursultan Nazarbaev Reseı tarapyna Qazaqstan tarıhyndaǵy úshinshi ǵaryshker A.Aıymbetovtiń ǵarysh ekspedısııasyn uıymdastyrýǵa járdemdeskeni úshin alǵys aıtty. Reseı prezıdenti óz sóznde búgin syndarly ári mazmundyy kelissózder ótkenin atap kórsetti. «Dástúr boıynsha bul kezdesýler ashyq ári dostastyq yńǵaıynda ótti. Biz saýda, ınvestısııa, energetıka, kólik, ǵarysh, atom energııasyn beıbit maqsatqa paıdalaný sııaqty salalarǵa aıryqsha kóńil bólip, ekijaqty qarym-qatynastardyń barlyq máseleleri boıynsha pikir almastyqı, – dedi V.Pýtın. Reseı Prezıdentiniń Qazaqstanǵa memlekettik sapary aıasynda tómendegideı ekijaqty qujattarǵa qol qoıyldy: – Jer qoınaýyn paıdalanýǵa qatysty egemendik quqyqtardy júzege asyrý maqsatynda Kaspıı teńiziniń soltústik bóliginiń túbin mejeleý týraly Qazaqstan Respýblıkasy men Reseı Federasııasy arasyndaǵy 1998 jylǵy 6 shildedegi kelisim hattamasyna ózgerister engizý týraly hattama; – Qazaqstan Respýblıkasy Úkimeti men Reseı Federasııasy Úkimeti arasyndaǵy Avıasııalyq izdestirý jáne qutqarý salasyndaǵy yntymaqtastyq týraly kelisim; – Qazaqstan Respýblıkasynyń aýmaǵyndaǵy jer ýchaskesin paıdalana otyryp, Dombarovskıı pozısııalyq aýdanynan zymyrandar ushyrý kezindegi ózara is-qımyl tártibi týraly Qazaqstan Respýblıkasy Úkimeti men Reseı Federasııasy Úkimeti arasyndaǵy kelisim. Aıdar О́risbaev. Derek, sýret: akorda.kz.