Akademık kitap qoryn túrik akademııasynyń kitaphanasyna syılady

ALMATY. 15 qazan. Til biliminiń kórnekti qaıratkeri akademık Rabıǵa Syzdyqova óziniń ǵumyr boıy jınaǵan 1500-ge jýyq kitap qoryn Halyqaralyq Túrki akademııasynyń kitaphanasyna tapsyrdy. Munyń syrtynda ǵalymnyń qoljazbalary men arhıvterden jınaǵan kóne basylymdary, qundy qujattardyń fotokóshirmeleri bar. Bul týraly egemen.kz habarlady. Saltanatty sharaǵa ǵalymmen birge Halyqaralyq Túrki akademııasynyń prezıdenti Darhan Qydyráli, A.Baıtursynov atyndaǵy Til bilimi ınstıtýtynyń dırektory Myrzabergen Malbaqov, belgili ǵalymdar jáne Rabıǵa Syzdyqovanyń shákirtteri men jas ǵalymdar qatysty. Akademııanyń kitaphanasy byltyr belgili majar túrkitanýshysy Ishtvan Qońyr Mandokıdyń jeke kitap qoryn qabyldap alǵan. Sondaı-aq, qazaqstandyq belgili ǵalymdar Ábdýálı Qaıdar men Áljan Quryshjanulynyń da jeke kitap qorlary da Halyqaralyq Túrki akademııasynyń kitaphanasyna tabys etilgen bolatyn. Halyqaralyq Túrki akademııasynyń prezıdenti Darhan Qydyráli bilikti ǵalym Rabıǵa Syzdyqovaǵa túrki murasyna qamqorlyǵy men túrkologııa ǵylymynyń damýyna qosqan ólsheýsiz úlesi úshin alǵys aıtyp, Halyqaralyq Túrki akademııasynyń sertıfıkatyn tabys etti. Talǵat Súıinbaı. Derek, sýret: egemen.kz.