Eleýsinov pen Dychko álem chempıonatynyń kúmis júldegerleri!

ASTANA. 16 qazan. Búgin Katar astanasy – Doha qalasynda ótken bokstan álem chempıonaty máresine jetti. Bul synda 69 kıloǵa deıingi salmaqta el namysyn qorǵaǵan boksshymyz Danııar Eleýsinov pen asa aýyr salmaqtaǵy (+91 kg) sańlaǵymyz Ivan Dychko kúmis medalge qol jetkizdi. Bul týraly egemen.kz habarlady. Eleýsinov fınalda marokkolyq Mohammed Rabıge ese jiberse, Dychkonyń fransýz Tonı Iokaǵa shamasy jetpedi. Sondaı-aq, Danııar kelesi jyly Brazılııanyń Rıo-de-Janeıro qalasynda ótetin Olımpıalyq oıyndarǵa joldama aldy. Osylaısha, Qazaqstan XVIII álem chempıonatynda eki kúmis medal jáne bir Olımpıada joldamasyn ıemdendi. 69 kıloǵa deıingi salmaqtyń fınaldyq jekpe-jeginde marokkolyqtyń bizdiń boksshydan basym bolǵanyn moıyndaýymyz kerek. Bıylǵy chempıonattyń basty jańalyqtarynyń biri bolǵan Mohammed Rabı Danııardyń ataq-dańqynan esh qaımyqqan joq. Alǵashqy sekýndtardan bastap alǵa umytylǵan ol birinshi jáne ekinshi raýndtarda úsh tóreshiden de joǵary upaı aldy. Al jekpe-jektiń sońǵy bóliginde bir tóreshi qazaqstandyqtyń jeńisin tirkegenimen, jalpy esepte afrıkalyqtyń mereıi ústem boldy. Osy rette Mohammed Rabıdiń Marokkodan shyqqan bokstan tuńǵysh álem chempıony ekenin atap ótken jón. Sonymen búginde Qazaqstan qorjynynda bokstan tórt joldama bar. Eleýsinovten bólek, boksshylarymyz – Birjan Jaqypov (49 kg), Berik Ábdirahmanov (60 kg) jáne Vasılıı Levıt buǵan deıingi jarystarda joldamaǵa qol jetkizgen bolatyn. Aıta keteıik, Qazaqstan Katarǵa segiz boksshy alyp bardy. Qaırat Erálıev (56 kg) pen Zákir Safıýllın (60 kg) alǵashqy jekpe-jekterinde ese jiberse, Oljas Sáttibaev (52 kg), Jánibek Álimhanuly (75 kg), Ádilbek Nııazymbetov (81 kg) jáne Vasılıı Levıt (91 kg) shırek fınaldan asa almady. Osyǵan deıingi 2013 jyly Almatyda ótken álem chempıonatynda boksshylarymyz 4 altyn, 2 kúmis jáne 2 qola medal enshilep, komandalyq esepte top jarǵan edi. Sol kezde Danııar álem chempıony atanyp, Ivan fınalda súrindi. Elaman Qońyr. Derek: egemen.kz. Sýret: vesti.kz.