Ánshi Roza «Men syıǵa tartqan oramal» dúkenin ashty

Ulttyq boıaýynan ajyramaǵan halyqtyń súıikti ánshisi, bes balanyń anasy Roza Álqoja óziniń jeke kásibin bastaǵany jaıly aldymen áleýmettik jelidegi dostarynan súıinshi suraǵan-dy. Ánshiniń bul bas­tamasy kópshilikke birden unap, ár elge elikteı bergenshe, oramaldy kıe tutqan analarymyzdyń ónegesin ulyqtaıyq dep, jaqsy lebizderge bólengen edi. «Qazaqtyń qyz-kelinshekterine arnap ádemi, sapaly, ózimizdiń dástúrimiz ben dilimizge saı kıim­der men oramaldar satatyn dúken ashý birazdan beri oıda júr­gen edi. Endi, mine, osy ıgi isti bastaýdyń sáti keldi. Dúıim jurt­qa ózimdi súıkimdi etken «Men syı­ǵa tartqan oramal» atty ánniń ataýyn osy dúkenge berip otyrmyz. О́ıtkeni, dúkende negizinen qyz-kelinshekterge arnalǵan oramaldar, analarǵa arnalǵan aq jaýlyqtar, qazaqy oıý-órnek bederlengen bas kıimder satylady. Sondaı-aq, úlken apa-ájelerimizge arnalǵan toı kóılekterin de biz­diń dúkenimizden taba alasyzdar. Qazirgi zamanda jasy úlken apalarymyz toıǵa jastardyń stılinde kıinip baryp júrgenin kórip júrmiz. Úlken kisiler ózi­mizdiń dástúrimizge jáne qazirgi zamanǵa saı ádemi kóılekter kıip, jaýlyǵyn salyp júrgeni qandaı jarasymdy bolar edi. Jas qyzdar men kelinshekterge arnalǵan sándi kıimder de bar. Bizdiń dúkendegi oramaldar, kıim-keshekter arnaıy stılıster men dızaınerlerdiń qoldarynan shyqqan» deıdi oqyrmannan aldymen súıinshi suraǵan Roza Álqoja «Alash aınasy» saıtynda. Aınash ESALI, «Egemen Qazaqstan». ALMATY.