Bilim salasyndaǵy biregeı baılanys

Búgin Astanada «Bolashak Alumni Reunion Conferenceand Education Fair-2015» atty dástúrli kórme-konferensııasy ótedi. Bul týraly keshe Ortalyq kommýnıkasııalar qyzmetinde ótken baspasóz máslıxatynda «Halyqaralyq baǵdarlamalar ortalyǵy» AQ prezıdenti Ǵanı Nyǵymetov málim etti. «Bul shara pikir almasý, bilim berý máse­lelerin oqytýdaǵy halyqaralyq úrdisterdi talqylaý úshin biregeı alań deýge bolady. Halyqaralyq sarapshylar Qazaqstanda júrgizilgen sátti reformalarǵa, Elbasynyń «100 naqty qadam» Ult jospary aıasynda iske asyryp jatqan kemel áreketterine baǵa berip, «Bolashaq» baǵdarlamasynyń damý keleshegin talqylaıdy», – dedi spıker. Sonymen birge, Ǵ.Nyǵymetov konferensııa aıasynda qazaqstandyq oqýshylar men stýdentter sheteldiń oqytý júıelerimen tanysa alatynyn jetkizdi. Alqaly forýmnan keıin 40-tan astam sheteldik ýnıversıtet ózderiniń oqytý baǵdarlamalaryn usynyp, úlken kórme ótkizetinin atady. Jıyn barysynda, Otanymyz bilim berý júıesin damytýda úlken jetistikterge jet­kenin, bul týraly joǵary bilim salasyndaǵy halyqaralyq sarapshy Djamıl Salmıde (Marokko) tilge tıek etip, oqytý isinde qarqyndy qadamdar jasalyp jatqanyn alǵa tartty. Ol: «2008 jyldan bastap biz jetekshi álemdik ınstıtýttarmen birlese otyryp bilim berý sapasyna baǵalaý júrgizip kelemiz. Jáne búginde Qazaqstan bul salada aıtarlyqtaı alǵa basty dep nyq senimmen aıta alamyn. Osy oraıda «Bolashaq» baǵdarlamasy zor mánge ıe bolyp, úlken jetistikterge jetti», – dedi. «Búginde kóptegen elder úkimetteri bilim baǵdarlamalaryn qarjylandyrýdy qysqartyp jatyr, al Qazaqstanda bolsa ondaı úrdister baıqalmaıdy», – dep Djamıl Salmı sózin qorytyndylady. Byltyr shamamen tórt myń adam qatysqan osyndaı kórme-konferensııa bıyl ekinshi jyl óz jalǵasyn taýyp otyrǵanyn da eske sala ketsek deımiz. Raýan QAIDAR, «Egemen Qazaqstan».