Kásibı baǵdar jáne arnaýly kórme

Oblys ortalyǵyndaǵy Qazaqstan hal­qy Assambleıasynyń ǵımaratynda «Bilim. Jumys. Mansap» VIII arnaýly kórmesi ótkizildi. Arnaýly kórmeni uıymdastyrýǵa oblystyq bilim basqar­masy, qalalyq jumyspen qamtý jáne áleýmettik baǵdarlamalar bólimi, oblys­tyq kásipkerler palatasy jáne «Aqtóbe oblysynyń kásipkerler jáne jumys berýshiler odaǵy» qoǵamdyq birlestigi uıytqy boldy. Sharanyń saltanatty ashylýynda sóz alǵan oblys ákiminiń orynbasary Sara Nurqatova mundaı kásibı baǵdar berý úrdisiniń mektep túlekteriniń mamandyqtaryn durys tańdaýyna tıimdiligi joǵary ekenine toqtaldy. Kórmeniń dástúrli túrde ótkizilip kele jatqany da sondyqtan. Bul kórmeniń tıimdiligi sol mektep túlekteri qaı salanyń mamany bolýǵa, qaı joǵary oqý ornynda nemese kolledjder men lıseılerde oqýǵa tańdaý jasaı alady. О́mir jolynyń bastaýynda mamandyqty durys tańdaý bul bolashaqtyń temirqazyǵyndaı bolyp, adamǵa qanat bitiredi, dedi Sara Qaıyrjanqyzy. Kórmeniń maqsaty suranys bar ma­man­dyqtardyń tusaýkeserin jasaý arqy­ly jastarǵa mamandyqty durys tańdaýǵa kómektesý, bilim mekemeleriniń, jańa baǵdarlamalardyń, tehnologııalar men oqý quraldarynyń múmkindikterin usyný, jumys berýshiler men bilim mekemeleriniń túlekterdi jumysqa ornalastyrý máselesin sheshý yntymaqtastyǵyna yqpal etý jáne kadrlar daıarlaý deńgeıin arttyrý bolyp tabylady. Oǵan 40-tan astam joǵary oqý orny, kásiptik kolledjder, bilim ortalyqtary, oqý kýrstary, kásiporyndar men uıymdardyń kadrlyq qyzmetteri qatysty. Olardyń arasynda Q.Jubanov atyndaǵy Aqtóbe memlekettik óńirlik ýnıversıteti, Ishki ister mınıstrligi tótenshe jaǵdaılar jónindegi komıtetiniń Kókshetaýdaǵy tehnıkalyq ınstıtýty, Astanadaǵy qazaq ınjenerlik-tehnıkalyq akademııasy, Orynbor memlekettik ag­rar­lyq ýnıversıtetteri, Qazaq-orys halyq­aralyq ýnıversıteti jáne basqalar bar. – Bul kórmege jylda qatysamyz. Kol­ledjdiń qandaı mamandyqtarǵa daıar­laıtynyn, materıaldyq-tehnıkalyq múmkindikteri qandaı ekenin, bizde oqyp jatqan shákirtterimizdiń mamandyq alý deńgeıin kórsetemiz. Sol arqyly ózimiz­ge oqýshylardy kóptep tartýǵa tyrysamyz. Bul joly da kórmege tııanaqty daıyndaldyq. Kolledj týraly mol aqparattarmen qamtamasyz etiledi. Oqýshylarymyzdyń qolynan shyqqan shyǵarmashylyq buıymdaryn da ala kelip, kórsetýdemiz, – deıdi Aqtóbe qurylys jáne bıznes kolledjiniń qyzmetkeri Qamalhan Qýanov. – Men byltyr 9-synyptan keıin qaı mamandyqty tańdaǵanym durys degen oıda júrdim. Osyndaı kórme júrip jatyr degen soń baryp kóreıin dep talap qyldym. Beker kelmeppin, osyndaǵy arnaýly kór­mege Aqtóbe polıtehnıkalyq kolledji de qatysyp jatyr eken. Kolledjdiń qandaı mamandyqtarǵa daıarlaıtynyn bildim, materıaldyq-tehnıkalyq bazasynyń jaqsy ekenine kózim jetti. Maǵan elektromehanık mamandyǵy unady. Sol jyly 9-synypty támamdaǵan soń qujatymdy osy kolledjge tapsyrdym. Bıyl 1-kýrsty aıaqtaımyn. Endi óndiristik tájirıbeden ótý úshin qaı kásiporynǵa barsam eken dep, tańdap júrmin. Maǵan ózim tańdaǵan mamandyq unaıdy, – deıdi Aqtóbe polıtehnıkalyq kolledjiniń stýdenti Dastan Amanov. Bul arnaýly kórmege tek oblystyń ǵana emes, elimizdiń basqa óńirlerindegi, sondaı-aq, kórshiles Reseıdiń kásiptik bilim beretin joǵary oqý oryndary men kolledjderi de qatysty. Shara sońynda oblys pen kórshiles óńirlerdiń kásiporyndary men kásiptik bilim berý mekemeleri arasynda yntymaqtastyq týraly kelisimge qol qoıyldy. Arnaýly kórme aıasynda bos jumys oryndary jármeńkesi uıymdastyryldy, oǵan oblystaǵy 30-dan astam kásiporyn men uıym qatysyp, 200-den astam bos jumys ornyn usyndy. – Jyl ótken saıyn kórmege qatysýshy­lardyń sany artyp, kókjıegi keńeıip keledi. Buǵan deıin elimizdiń kórshiles oblystary ǵana qatysyp kelse, bıyl Reseıdiń Orynbor jáne Astrahan oblystarynan joǵary oqý oryndary men kolledjderi kelip qatysýda. Munyń ózi mundaı arnaýly kórmeni uıymdastyrýdyń tıimdiligin kórsetedi, – deıdi aımaqtyq kásipkerler palatasy dırektorynyń orynbasary Damılıa Qunanova. Satybaldy SÁÝIRBAI, «Egemen Qazaqstan». Aqtóbe oblysy.