Almatylyq kásipkerler EKSPO-2017 qurylysyna atsalyspaq

Taıaýda Tuńǵysh Prezıdent qory ǵımaratynda Almaty ákimi Baýyrjan Baıbek pen «Astana EKSPO-2017» Ulttyq kompanııasy» AQ basqarmasynyń tóraǵasy Ahmetjan Esimov jalpy quny 10 mlrd. teńge bolatyn ózara yntymaqtastyq týraly memorandýmǵa qol qoıdy. Aldaǵy ýaqytta atalmysh memorandýmǵa sáıkes Almaty qalasynyń kásiporyndary Astanada ótetin asa mańyzdy halyqaralyq jobaǵa qatysyp, EKSPO-2017 jobasyn uıymdastyrýǵa ǵana emes, qurylys jumystary men paıdalaný kezeńinde óz ónimderin jetkizý boıynsha uzaq merzimdi kelisimshart jasasýǵa múmkindik aldy. – Búgin bizdiń qalamyzda óte mańyzdy is-shara ótip jatyr, – de­di jıyndy ashqan qala ákimi Baýyrjan Baıbek. – Elimiz úshin asa mańyzdy EKSPO-2017-ni ótkizý úshin bas merdiger, Ulttyq kompanııanyń tóraǵasy Ah­metjan Smaǵululy komandasymen óziniń súıikti qalasyna kelip, ondaǵy múmkindikpen tanysyp, kásipkerlerge qoldaý ja­samaq. Onyń ústine ol kisi qaladaǵy kóptegen mańyzdy jo­balardyń negizin qalaǵan adam. Búgingi forýmǵa eki júzden asa qala­­daǵy iri kásiporyndardyń bas­shylary qatysyp, forým aıasynda olardyń 40-tan astamy óz taýarynyń jármeńkesin usynyp otyr. Bul degenińiz – qurylys ma­­terıaldary, qural-jabdyqtar men arnaıy tehnıkalar, jıhaz, kıim-keshek, jádigerlik buıymdar. Shyǵaratyn ónimderiniń sapasy óte joǵary. Elbasy aıtqan­daı, EKSPO – ásirese búgingideı qıyn ýaqytta ekonomıkamyz­dyń draıveri. Sonyń negizinde týrızm salasyn damytyp, ınvestısııa men jańa tehnologııalardy tartyp, jańa jumys oryndary ashylatyn bolady. Sondyqtan sapaly ónim shyǵaratyn almatylyq kompanııalar EKSPO-2017 kórmesin qoldaýǵa belsendi aralasatynyna senimdimiz. EKSPO-2017 jalpyulttyq jobasy aıasynda Almaty qalasyn­da aımaqtyq is-qımyl jospary ázirlengenin, soǵan sáıkes Almaty qalasy el tarıhyndaǵy eleýli sharany joǵary deńgeıde ótkizýine zor úles qosatynyn, ol úshin qa­la­myzda barlyq múmkindikter bar ekenin jetkizip, baıandama jasa­ǵan qala ákiminiń orynbasary Er­lan Áýkenov, sondaı-aq, qalada 184 myń bıznes sýbektisi, onyń ishinde 1800 óndiris orny, 2,5 myń qu­rylys kompanııasy, 900-ge tarta týrıstik fırma, 122 qonaqúı ornalasqanyn, olardyń kópshi­li­gi atalmysh jobaǵa qatysýǵa úlken qy­zy­ǵýshylyq bildirip otyrǵanyn jetkizdi. Oǵan qosa Baýyrjan Qydyr­ǵalıuly kelisimshartqa qol qoıyl­­ǵan soń «Jol kartasy» qabyl­danatynyn, sol boıynsha Almaty qalasy aýqymdy sharany ótkizýge ózindik úles qosyp, jarnama, uıymdastyrý, t.b. jaǵynan úlken kómek kórsetetinin tilge tıek ete ketti. Megapolıste soń­ǵy 3 jylda ınvestısııa kólemi 12 paıyzǵa, al tehnologııalyq ın­novasııalyq kásiporyndarǵa jumsalǵan qarajat 2 esege artqan. Almatynyń 30-dan astam óndiris oshaǵy óz ónimin TMD, Eýropa men Ońtústik-Shyǵys Azııa elderine eksporttaıdy. О́z kezeginde sóz alǵan «EKSPO-2017» UK» AQ basqarma tóraǵasy Ahmetjan Esimov Al­maty kásiporyndarynyń qa­tysýynsyz halyqaralyq kórmeni ótkizý múmkin emestigin jetkizdi. – Kóptegen kompanııalardyń damýyn jaqsy bilemin. Olarda ózim bolǵanmyn. Almatynyń áleýeti óte joǵary ekenin de bile­min. Almaty – elimizdiń basty lo­ko­motıvi. Munda ǵylym men bilim oshaqtary, iri óndiris oryndary shoǵyrlanǵan. Biraq osyǵan deıin qalanyń EKSPO-2017 jobasyndaǵy qatysy óte belsendi emes bolatyn. Soma da asa máz emes – 550 mln. teńge. Búgin quny 10 mıllıard teńgege seriktestik jónindegi kelisimge qol qoıylmaq. Ázirge memorandým 8 oblyspen jasalyp, jalpy 300-ge jýyq kásip­oryn jumyldyryldy. Al­maty – kelisim jasalyp otyr­ǵan 9-shy aımaq. Jalpy alǵanda segiz aımaqtan 23 mlrd. teńgege kelisimshart jasalyp, 10 myń jumys orny paıda boldy, – dedi Ahmetjan Esimov. Osylaısha, Almaty EKSPO-nyń tyǵyz qarym-qatynas or­natqan 9-shy óńiri boldy. Búgin­de qurylys alańynda 7800 adam ter tógýde. Prezıdentimiz aıtqandaı, bul joba – daǵdarys kezinde jańa jumys oryndar ashyp, kásiporyndardyń tynysyn keńeıtýge múmkindik beretin jobalardyń biri bolmaq. Sondaı-aq, eki tarap memorandýmdy júzege asyrý boıynsha qolǵa alynatyn sharalardyń josparyn qurdy. Gúlzeınep SÁDIRQYZY, «Egemen Qazaqstan».