Birikken Ulttar Uıymynyń Halyqaralyq soty 22 shildede Kosovonyń óziniń táýelsizdigin jarııalaýy zańǵa qaıshy emestigin málimdedi. Al Kosovo óziniń táýelsizdigin 2008 jyly 17 aqpanda jarııalaǵan. Búginge deıin Kosovonyń táýelsizdigin 69 el tanydy. Reseı jáne onyń yqpalyndaǵy biraz el tanyǵysy joq.
Olar Kosovony tanysa, Prıdnestrove, Abhazııany da taný kerek degendi aıtady. Al bulardy salystyrýǵa kelmeıdi. Serbııanyń Kosovodaǵy taǵylyq genosıdtik áreketin umytýǵa bolmaıdy. Halyqaralyq sot sheshiminen keıin Kosovony tanıtyndar sany kóbeıetini sózsiz.
Áskerin qysqartpaq
Ýkraına basshylyǵy óz áskerin 15-20 paıyzǵa qysqartý jóninde sheshimge kelipti. Ásirese, bul ekonomıkalyq qıynshylyqqa ushyraǵan el úshin óte mańyzdy. Bul zamanda beıbit saıasat ustaǵan elge eshkim basyp kirmeıdi. Sondyqtan kóp ásker ustaýdyń qajeti shamaly. Búginge deıin Ýkraınada ásker sany 200 myń tóńireginde bolsa, ony birshama qysqartýdan aıtarlyqtaı qarjy únemdelmek.
Izdegenge jaý kóp
Iran Islam Respýblıkasynyń prezıdenti M.Ahmadınejad Iranǵa qarsy AQSh ssenarııin qoldaǵan elderdiń barlyǵyn ózderine jaý sanaıtynyn málimdedi. Bul jerde “Meniń jaýymnyń dosy maǵan jaý” qaǵıdasy qoldanylyp otyrǵany belgili. Búgingi ıntegrasııalyq zamanda bul qaǵıda jaqsylyqqa aparmaıdy. Aparmaǵanda, Iran az degende álemniń jartysyn ózine jaý etýi múmkin. Kóp el AQSh-taı órkenıettiń bıigine kóterilgen uly elmen Iranǵa bola jaý bola almaıdy. AQSh-tyń bastamasymen jáne kóp eldiń qoldaýymen ázirlengen BUU-nyń Iranǵa qarsy sanksııasynan bas tartpaıdy.
Bopsadan seskenbedi
Birazdan beri Koreıa túbegi aımaǵynda aıtarlyqtaı shıelenisti jaǵdaı qalyptasyp otyr. Ońtústik jáne Soltústik Koreıa memleketteri ańdysyp ómir súrip jatyr. “Sen óıtseń, men búıtem” degen qorqytýlar eki jaqtan da jıi aıtylady. Eń aldymen KHDR Ońtústik Koreıa men AQSh-tyń birikken áskerı jattyǵý ótkizýine qarsy biraz qoqan-loqqy bildirgen. Soǵan qaramaı, olardyń Áskerı-teńiz kúshteri Japon teńizinde birikken jattyǵýlaryn bastap ketti. Jurt buǵan jaýap retinde KHDR qandaı áreketke barady eken dep mazasyzdanyp otyr.
Aıtmatovty aıyptaǵan
Fergana.ru-dyń habarlaýyna qaraǵanda, О́zbekstan úkimeti eldiń aqparat quraldarynyń basshylaryna uly qyrǵyz jazýshysy Shyńǵys Aıtmatovtyń atyn da, shyǵarmalaryn da atamaý jóninde aýyzsha nusqaý bergen kórinedi. Olar muny jaqynda Qyrǵyzstannyń ońtústik óńirinde bolǵan oqıǵalarǵa jaýap dep eseptese kerek. Onda ózbek ultynyń ókilderi qýǵynǵa ushyraǵan bolatyn. Biraq oǵan “Adamzattyń Aıtmatovy” atanǵan uly jazýshynyń ne aıyby bar?
Ultshyldarǵa oryn joq
Ulybrıtanııa korolevasynyń jylyna bir ret eldiń belgili adamdaryn dastarqanǵa shaqyratyn dástúri bar. Bul ádette asta-tók toı emes, jaı qurmet belgisindeı resmı shara. Bermıngem saraıyna 8 myń adamnyń biri retinde ásireońshyl Brıtanııa ulttyq partııasynyń kósemi Nık Grıffen de shaqyrylǵan edi. Ol dereý málimdeme jasap, jeke tulǵa retinde emes, ultshyldar atynan baratynyn aıtqan soń, koroleva ákimshiligi dereý shaqyrýdy keıin qaıtaryp alypty. Aldynda ol Eýroparlament depýtaty retinde shaqyrylǵan eken.
Zańdy dıktator
Ońtústik Amerıkanyń soltústik shyǵysyndaǵy shaǵyn ǵana Sýrınam dep atalatyn memlekette árkez tóńkeris bolyp jatady. Onyń birazyn eldiń qazirgi prezıdenti Dezı Beýterse júzege asyrǵan. Ol sekseninshi jáne toqsanynshy jyldarda eki ret tóńkeris arqasynda bılikke kelip, shaǵyn elde dıktatorlyq tártip ornyqty. Bir qyzyǵy – ótken apta basynda ol “demokratııalyq jolmen” bılikke keldi: parlamenttegi 51 depýtattyń 36-sy ony jaqtap daýys berdi. Jurt burynǵy dıktator endi qandaı tártipti qalar eken dep júr.
Ázirlegen Mamadııar JAQYP.
