Bular – adamdy tárbıeleýge arnalǵan reformalar

«Bolashaǵy birtutas ult ıns­tıtýttyq reformasy aıasynda «Máńgilik El» jalpyulttyq ıdeıa­syn iske asyrý týraly» taqy­rybynda Májilis depýtaty Kamal Burhanov keshe Ortalyq kommýnıkasııalar qyzmetinde brıfıng ótkizdi.  Memleket deńgeıinde búkil qoǵam bolyp Elbasy bastaǵan bes ıns­tı­týttyq reformaǵa qatysty kúrdeli jumystar júrgizilýde, dep sózin bas­taǵan Májilis depýtaty onyń jumy­syna depýtattar, fraksııalar múshe­leri jáne ǵalymdar atsalysýda eken­digin atap kórsetti. Depýtat bul rette eli­mizde qazirgi álemde oryn alyp jat­qan daǵdarystarǵa qar­sy arnaıy baǵ­darlamalar ázir­len­gendigin de tilge tıek etti. «Negizinen, júzege asyrylyp jatqan reformalardyń barlyǵy ult­ty jańǵyrtýmen tikeleı baı­la­nysty. «Qazaqstan-2050» Stra­te­gııasy júzege asyrylýda. Árbir bes jyldyqqa bura­lańy kóp jol­darda naqty mindetter aıqyn­dalyp qoıylǵan. Ultty jańǵyr­tý degenimiz órkenıetti 30 eldiń qa­taryna engen memleketti salý ǵana emes, soǵan laıyq turǵyndardy da daıyndaýymyz kerek», dep sa­baqtady sózin Kamal Nızamuly. Ásirese, bul jastarǵa qatysty eken­digimen bólisken depýtat eli­mizdiń árbir azamaty damyǵan 30 eldiń qataryndaǵy memlekette ómir súrýge laıyq bolýy tıistigin de eskertip ótti.  Buǵan bes ıns­tı­týttyq reformany júzege asy­rýdaǵy «100» qadam ózindik yq­pal etýi tıis. K.Burhanovtyń paıymynsha, «Máńgilik Eldiń» astarynda qýatty ádistemelik-teorııalyq negiz bolýy shart. Sondyqtan da, bul qazirgi jáne bolashaq urpaqtyń ómir súrý fılosofııasyna aınalǵany abzal. «Bilim berý fılosofııasy 30 damyǵan elde ómir súrýge negiz­delýi tıis. Re­formany aqparatpen qamtamasyz etý jaıyna kelsek, kez kelgen reforma qýat­ty ıdeo­lo­gııalyq jáne úgittemelik ilespemen jalǵasýy oryndy», dedi depýtat. El turǵyndarynyń 95 paıy­zy ózderin Qazaqstan Respýb­lıka­synyń azamattary retinde sezinetinin alǵa tartqan K.Burha­nov bul memleket pen Elbasy­nyń sarabdal saıasatynyń arqa­synda múmkin bolǵandyǵyn atap kórsetti. Sondyqtan da, Ult­ty jańǵyrtý reformasyn ári qaraı da jalǵastyra berý kerek. Sıngapýrdyń burynǵy kóshbas­shysy ony álemdegi damyǵan bes eldiń qataryna qosa bildi. Ol tek memleketti aıaǵynan turǵyzyp qana qoımaı, qoǵamdy da soǵan sáıkes etip tárbıeleı aldy. «Eger biz sol baǵytta jyljıtyn bolsaq, onda sondaıǵa laıyq áreketke kóshý qajet. Nege Japonııa men Germanııa Ekinshi dúnıejúzilik soǵysta jeńilis tapqanymen, araǵa ondaǵan jyldar salyp álemniń ekonomıkalyq derjavalaryna aınalyp shyǵa keldi? Eńbekqorlyq pen tártip osyndaı nátıjege jetkizgen. Barlyǵy da adamǵa baılanysty», dedi K.Burhanov. Onyń aıtýynsha, mynadaı halyq danalyǵy bar: «Eger sen bir jylǵa shamalasań, onda astyq ek. Al eger júz jylǵa shamalasań, onda tal otyrǵyz. Máńgilikke ún qatqyń kelse, onda adamdy tárbıeleýiń kerek». Olaı bolsa, bes ınstıtýttyq reforma da osy adamdy tárbıeleýge baǵyttalǵan. Asqar TURAPBAIULY, «Egemen Qazaqstan».