Keshe Otanymyz boıynsha 1200 adam «Nur Otan» qataryna qabyldandy
Astanadaǵy Qazaqstan Respýblıkasynyń Tuńǵysh Prezıdenti mýzeıinde Elorda kúnine oraı azamattardy «Nur Otan» partııasynyń qataryna qabyldaýdyń dástúrli rásimi ótti. Jıynda partııa Tóraǵasynyń birinshi orynbasary Baýyrjan Baıbek «Nur Otannyń» 12 jańa múshesine partııalyq bıletterdi tabys etti.
Saltanatty basqosýda Baýyrjan Baıbek qazirgi tańda «Nur Otannyń» 860 myń múshesi bar ekenin, Astana kúniniń qurmetine oraı partııa qataryna taǵy da elimizdiń barlyq óńirlerinen 1 258 adam qosylǵaly turǵanyn, olardyń jańa úlgidegi partııalyq bıletterge ıe bolatynyn atap ótti. Onyń aıtýynsha, «Nur Otanǵa» múshelikke ótkenderdiń barlyǵy da partııanyń ıdeıalary men qaǵıdattaryn qoldaıtyn, óz eńbekterimen elimizdiń damýyna zor úles qosyp kele jatqan laıyqty azamattar.
– Jyl saıyn bizdiń qatarymyzǵa qosylǵysy keletinder sanynyń artyp kele jatqany qýantady. Mundaı nıettegilerdi partııanyń negizin qalaýshy ári saıası ıdealy Nursultan Nazarbaevtyń sarabdal saıasaty arqasynda alǵa basqan elimizdiń damýyna atsalysqysy keletin azamattar dep bilemin. Memleket basshysy atap ótkendeı, «reformalar árbir azamattyń qatysýyn talap etedi». Elbasy reformalary elimizdi túbegeıli ózgertedi, azamattardyń ál-aýqatyn arttyrady, álemdegi aldyńǵy qatarly 30 memlekettiń qataryna qosylýǵa múmkindik beredi. Negizinen, bizdiń partııanyń mindeti – elimizdiń birligi men yntymaǵyn qamtamasyz etý. Birliksiz, tatýlyqsyz eldiń damýyna qol jetkizilmeıdi, – dedi partııa Tóraǵasynyń birinshi orynbasary.
Budan keıin Baýyrjan Baıbek partııa bıletin alǵaly turǵan 12 otandasymyzǵa qarap:
– Biz sizderdiń «Nur Otan» partııasynyń qataryna ótýge qatysty qabyldaǵan sheshimderińizdi qurmetteımiz. Barlyqtaryńyz óz aımaqtaryńyzda, respýblıkamyzda óte tanymal tulǵalarsyzdar, eńbekterińiz ben tabystaryńyz arqyly el bolashaǵy úshin ter tóge alatyndaryńyzdy kórsete bildińizder. Partııa sizderge elimizdiń órkendeýine úles qosýǵa jańa múmkindikter beretinine senemiz», – dedi B.Baıbek.
Budan keıin partııanyń jańa múshelerine saltanatty jaǵdaıda bılet tapsyrý rásimi ótti.
Sonymen, bul kúni Prezıdent janyndaǵy Memlekettik basqarý akademııasynyń professory Zınaıda Fedotova, «Jambyl elektr jelileri» JShS bas dırektory Álıhan Jarbolov, Kazakhstan Computer Graphics JShS bas dırektory Ernar Qurmashev, «Jasyl El» jastar eńbek jasaǵy respýblıkalyq shtabynyń jetekshisi Rahat Hamıdýllın, «Qazaqstan» RTRK AQ aqparattyq-saraptamalyq dıreksııasynyń dırektory Qurmanbek Qazanbasov, Jambyl atyndaǵy Qazaq memlekettik fılarmonııasynyń dırektory Aqan Ábdýálıev, Qostanaı oblysynyń «TORO» kompanııasynyń dırektory Maıl Toroıan, Aqtóbe oblysynyń «О́serbaı» sharýa qojalyǵynyń basshysy Larısa Iý, Batys Qazaqstan oblysyndaǵy «Zenıt» zaýytynyń ınjener-qurastyrýshysy Dáýren Ohasov, rejısser jáne akter Maksım Akbarov, estradalyq ánshiler Qaırat Nurtas pen Janar Duǵalova partııa qataryna ótti.
Zınaıda Fedotova partııalyq bıletti qabyldap alý sátinde: «2015 jyldyń maýsymynda Qoǵamdyq saıasat ınstıtýty sarapshylar qaýymdastyǵy júrgizgen saýaldama nátıjesi el azamattarynyń 83,3 paıyzy «Nur Otan» partııasyna senetinin kórsetip berdi. Men de óz partııama senemin jáne qoǵam ómirine belsene atsalysamyn, partııamyzdyń Kóshbasshysy usynyp otyrǵan barlyq bastamalardy qoldaımyn. Budan ári qaraı da osy baǵytta óz úlesimdi qosa beretinime senimdimin», – dedi.
О́z kezeginde Memleket basshysynyń ómirine arnalǵan «Meniń balalyq shaǵymnyń aspany», «Elbasy joly» fılmderiniń kompıýterlik grafıkasyn jáne «Qazaqstandyqtar – Keńes Odaǵynyń Batyrlary» beıneantologııasyn daıyndaýǵa qatysqan Ernar Qurmashev: «Nur Otan» partııasynyń bıznesti, kásipkerlikti qoldap kele jatqanyn kórip júrmin. Negizinde, bıznesmender elimizdiń ósip-órkendeýiniń qozǵaýshy kúshi bolyp tabylady. Sondyqtan, kásipkerlerdiń, olardyń arasynda jas bıznesmenderdiń boıyna patrıotızm men el aldyndaǵy jaýapkershilik sezimin sińire bilýimiz kerek», – degen pikirin jetkizdi.
Estrada ánshisi, «Elbasymen birge – jańa jeńisterge!» jastar forýmynyń qatysýshysy Qaırat Nurtas partııanyń qoǵamymyzdaǵy orny, bedeli jóninde aıta kelip: «Nur Otan» – Elbasymyzdyń partııasy. Partııanyń barlyq bastamalary qazaqstandyqtardyń jasampazdyǵy men olardyń yntymaǵyn nyǵaıtýǵa baǵyttalǵan. Muny barshamyz bilemiz. Sondyqtan men óz elimniń keleshegi úshin aıanbaı eńbek etý maqsatynda nurotandyqtardyń qatarynda bolýdy qup kórdim», – dedi.
Sondaı-aq, partııaǵa múshelikke qabyldaý rásimi sátinde estrada ánshisi, «Turkvizyon-2014» baıqaýynyń jeńimpazy Janar Duǵalova Elbasy partııasynyń múshesi bolý zor qurmet qana emes, sondaı-aq, úlken jaýapkershilik júkteıtinin jetkize otyryp: «Jas Otannyń» sezinde Prezıdenttiń aldynda sóz sóılep, saılaýda Respýblıkalyq shtab quramynda turǵyndarmen kezdesip, olardyń Elbasyn qalaı qoldaıtyndaryn kórip, elimizdiń ósip-órkendeýi úshin úles qosa alatynymdy túsindim. Sondyqtan da men «Nur Otan» partııasynyń qataryna ótýdi uıǵardym. Men «Nur Otannyń» qoǵamǵa, qarapaıym azamattarǵa, ásirese, jastarǵa degen kózqarasy men ustanymdaryn tolyq qoldaımyn», – dedi.
Aıta keteıik, qazirgi tańda «Nur Otannyń» 5 700 bastaýysh uıymy jumys isteýde. Partııa músheleriniń 32 paıyzy ǵylym men bilim, mádenıet salasynyń, 8 paıyzy densaýlyq saqtaý salasynyń qyzmetkerleri. Partııa músheleriniń 60 paıyzy – áıelder.
Joldybaı BAZAR,
«Egemen Qazaqstan».
