Elbasy VIII Astana ekonomıkalyq forýmyna qatysýshylarmen kezdesti

ASTANA. 22 mamyr. Elbasy Nobel syılyǵynyń laýreattarymen, halyqaralyq uıymdar jáne damý ınstıtýttarynyń basshylyǵymen, sondaı-aq, VIII Astana ekonomıkalyq forýmyna qatysýǵa kelgen kompanııalar jetekshilerimen kezdesti. Bul týraly akorda.kz habarlady. Memleket basshysymen kezdesýge Nobel syılyǵynyń laýrettary F.-E.Kıdland, E.Maskın, Dj.Smýt, T.Karman, sondaı-aq, fransýz ekonomısi J.Attalı, BUU Azyq-túlik jáne aýyl sharýashylyǵy uıymynyń bas dırektory J.-G.Da Sılva, BUU Damý baǵdarlamasy ákimshisi H.Klark, Ekonomıkalyq yntymaqtastyq jáne damý uıymynyń syrtqy baılanys jónindegi dırektoratynyń basshysy M.Bontýrı, Eýropalyq qaıta qurý jáne damý bankiniń vıse-prezıdenti B.Nelson, Azııa damý bankiniń vıse-prezıdenti Ch.Venchaı jáne McKinseyGlobalInstitute dırektory R.Dobbs qatysty. Áńgime barysynda ınfraqurylymdyq jáne ındýstrııalyq-ınnovasııalyq damýdy qamtamasyz etý turǵysynan Qazaqstannyń qabyldap jatqan sharalary talqylandy. Nursultan Nazarbaev olarǵa VIII Astana ekonomıkalyq forýmy jumysyna qatysqandary úshin alǵys aıtyp, bıylǵy pikirtalas óńirlik ınfraqurylymdyq damý máselelerine arnalyp otyrǵanyna toqtaldy. «Búginde biz kóptegen damýshy elder ekonomıkalyq ósimniń irkilýi men ınvestısııalardyń syrtqa ketýi máselesine kezikkenin kórip otyrmyz. Damyǵan elderde de birqatar túıtkilder bar. Qazaqstan jahandyq ekonomıkanyń bir bólshegi bola otyryp, óńirimizde turaqtylyqty qamtamasyz etýge jáne ornyqty damý úlgisin kórsetýge tyrysyp keledi. Bizdiń basty mindetterimizdiń biri adamı kapıtaldy damytýǵa ınvestısııa tartý bolyp sanalady. Osy oraıda Astana ekonomıkalyq forýmy ıgi dástúrge aınaldy. Bizdiń forýmǵa qatysýshylarǵa, ásirese, Qazaqstannyń ınfraqurylymdyq damý úshin qabyldap jatqan sharalary týraly aıtarymyz bar. Bizdiń pikirtalastarymyz álemdik ekonomıkanyń damýyna óz úlesin qosady dep úmittenemin», – dedi Qazaqstan Prezıdenti. Memleket basshysy kezdesýge qatysýshylar nazaryn álemdik qoǵamdastyq aldynda turǵan máseleler men qaýip-qaterlerge aýdardy. «Bularǵa álemdik júıe tártibindegi daǵdarys pen elder arasyndaǵy senimniń joǵalýy, jahandyq ekonomıkanyń týrbýlenttiligi, klımattyń ózgerýi, ara-jik ajyratýdyń jańa, sonyń ishinde Ortalyq Azııa óńirindegi kórinisi, sondaı-aq, álemdik qoǵamdastyqtyń beıbitshilikti saqtaý qabiletiniń álsireýi jatady. Eger biz osy qaterlermen kúresýdiń joldaryn usynatyn bolsaq, ol ilgerileý men ekonomıkany damytýdyń jańa kókjıegin ashýǵa, demek, adamdardyń turmysyn jaqsartýǵa múmkindik beredi», – dedi Nursultan Nazarbaev. Kezdesýge qatysýshylar VIII Astana ekonomıkalyq forýmy jahandyq áleýmettik-ekonomıkalyq máselelerdi talqylaıtyn mańyzdy pikirtalas alańy bolyp sanalatynyn aıtty. Nobel syılyǵynyń laýreaty F.-E.Kıdland Qazaqstan Prezıdentine forýmǵa shaqyrylǵany úshin alǵys aıtyp, Qazaqstan álemdegi meılinshe jedel damyp kele jatqan eldiń biri ekenine toqtalyp ótti. «Qazaqstan betpe-bet kelgen syn-qaterdiń biri – ornyqty ósimdi saqtaý úshin qajet bilikti mamandar izdestirý boldy. Osyǵan baılanysty eldiń múddesine tolyq saı keletin bilim berý júıesin damytý men jetildirýge Sizdiń jumsaǵan kúsh-jigerińizdi atap aıtýǵa ruqsat etińiz», – dedi F.-E.Kıdland. Ekonomıkalyq yntymaqtastyq jáne damý uıymynyń Syrtqy baılanystar jónindegi dırektoratynyń basshysy M.Bontýrı Nursultan Nazarbaevty eldiń prezıdenti bolyp qaıta saılanýymen quttyqtap, memleket qurý isindegi «100 naqty qadam» baǵdarlamasynyń der kezinde qabyldanǵanyn aıtty. «Qazaqstanmen arada nyǵaıyp kele jatqan ózara is-qımyldy biz maqtanysh etemiz. Bizdiń uıym halyqtyń tabysy tómen, turmysy nashar tobynyń ál-aýqatyn jáne áıelderdi eńbekke tartý deńgeıin arttyrý máseleleri boıynsha yntymaqtastyq jasaıdy. Men ekonomıkanyń ornyqty damýy men teńgermeli ósimin qamtamasyz etý baǵytyndaǵy Qazaqstannyń kúsh-jigeri men órshil josparlaryn tolyq qoldaıtynymyzǵa Sizdi sendirgim keledi», – dedi M.Bontýrı. Elaman Qońyr. Derek, sýret: akorda.kz.