Prezıdent VIII Astana ekonomıkalyq forýmynyń jumysyna qatysty

ASTANA. 22 mamyr. Memleket basshysy VIII Astana ekonomıkalyq forýmynyń jumysyna qatysty. «Infraqurylym: ekonomıkanyń ornyqty ósiminiń draıveri» taqyrybyna arnalǵan forýmǵa álemniń 90 elinen 3000-ǵa jýyq saıası, sarapshylyq jáne iskerlik top ókilderi keldi. Bul týraly akorda.kz habarlady. Qazaqstan Prezıdenti forýmda sóılegen sózinde búgingi jahandyq keńistikte bolashaqtaǵy órkendeýge qaýip tóndiretin syn-qaterler týyndap kele jatqanyna nazar aýdardy. «Biz álemde burynǵy tejeý jáne arasalmaq saqtaý júıesiniń kúıreýine, uly derjavalar kóshbasshylary arasyndaǵy senimniń joǵalýy men halyqaralyq quqyqtyń qojyraýyna kýá bolyp otyrmyz. Halyqaralyq ınstıtýttar beıbitshilik pen turaqtylyqqa kepildik bere almaıdy. Sonymen qatar, klımattyń ózgerisi jyldam júrip jatyr. Bul saldary aýyr tabıǵat apattarynan kórinis tabýda. Azyq-túlik tapshylyǵy da jalǵasyp otyr. Halyq sanynyń, tabys pen ýrbanızasııanyń ósýi sekildi úshjaqty úderistiń qysymymen taıaý 30 jylda azyq-túlik óndirisin eki eseleýdi qajet etedi. Muny jerdiń resýrsy taýsylyp jatqan kezde isteýge týra keledi», – dedi Nursultan Nazarbaev. Memleket basshysy kólik salasyndaǵy birlesken bastamalar yntymaqtastyq úshin jaqsy irgetas bolatynyn aıtty. «Ol elderdiń, sondaı-aq, óńirlik birlestikterdiń ózara tyǵyz is-qımyly men yqpaldastyq formalaryna bastaý bolýy tıis. Men Birikken eýrazııalyq ekonomıkalyq keńistik qurýdy usynamyn. Bizge barlyq qatysýshylardyń ulttyq múddelerin eskeretin jáne kedergilerdi joıýǵa, ózara tıimdi yqpaldastyqty arttyrýǵa baǵyttalatyn biryńǵaı qaǵıdalar qabyldaý mańyzdy. Qaǵıdalar birinshi kezekte saýda, tasymal jáne resýrs qozǵalysyna qatysty bolýy tıis. Jibek jolynyń ekonomıkalyq beldeýin qurý túpki máninde osy qaǵıdattardy qalyptastyrady», – dedi Qazaqstan Prezıdenti. Nursultan Nazarbaev usynylyp otyrǵan Birikken eýrazııalyq keńistik aıasynda qurlyqtyń ári qaraı damý baǵyttary men yqpaldastyq deńgeıin arttyrý jónindegi usynymdar ázirlenetin, turaqty jumys isteıtin alań qurý qajettigin atap ótti. Memleket basshysy Astana ekonomıkalyq forýmynyń osyndaı alań bola alatynyn aıtty. Forýmnyń jalpy otyrysynyń moderatory VVS bas bıznes-tilshisi L.Iýe boldy. Sondaı-aq, is-shara barysynda BUU Damý baǵdarlamasynyń ákimshisi H.Klark, Lıýksembýrg premer-mınıstri K.Bettel, JP Morgan Chase International kompanııasynyń tóraǵasy D.Frenkel, ekonomıst K.Rogoff, Roubini Global Economics prezıdenti N.Rýbını sóz sóıledi. Sonymen qatar, forým qatysýshylaryna Ekonomıkalyq yntymaqtastyq jáne damý uıymynyń bas hatshysy sóz arnady. Elaman Qońyr. Derek, sýret: akorda.kz.