О́zbekstannyń Ortalyq banki valıýta almastyrýdy toqtatty

ALMATY. 22 mamyr. О́zbekstannyń Ortalyq banki sheteldik valıýtalardyń barlyǵyna almastyrý operasııalaryn toqtatty. Jeke jáne zańdy tulǵalarǵa qatysty mundaı tyıym salý shilde aıynyń basyna deıin saqtalýy múmkin. Bul týraly ca-news habarlady. Basylym – buǵan deıin Ortalyq bank eldiń premer-mınıstrine aqsha qorynyń tapshylyǵy týraly eskertken deıdi. О́tken aptada el astanasyndaǵy «qara bazarlarda» bir AQSh dollarynyń quny 5 myń ózbek somyna deıin kóterilip, rekordtyq deńgeıge jetti. Naýryz aıynda ol kórsetkish 3700 sým bolǵan. Soǵan qaramstan Ortalyq banktiń 21 mamyrǵa deıingi bekitilgen resmı baǵamy 2527 sýmdy qurap tur. 2013 jyldyń 1 aqpanynan bastap О́zbekstanda jeke tulǵalarǵa sheteldik valıýtalar satylmaıdy. Jeke tulǵalar qajetti jaǵdaıda Ortalyq bankke baryp, ondaı aqshany plastıkalyq kartochkaǵa aýdaryp alýǵa ǵana múmkindigi bar. Sondaı-aq, el ishinde sheteldiń valıýtalarmen saýda jasaýǵa da tyıym salynǵan. Talǵat Súıinbaı. Derek: ca-news. Sýret: gazeta.uz.