Keshe Elbasy Nursultan Nazarbaev elordadaǵy «Atameken» etno-memorıaldy kesheni alańynda jyl saıynǵy dástúr boıynsha Memlekettik tý kóterý saltanatty rásimine qatysty. Rásim aıasynda Memleket basshysy – Qazaqstan Respýblıkasy Qarýly Kúshteriniń Joǵarǵy Bas qolbasshysy eldiń joǵary áskerı oqý oryndarynyń túlekterine ofıserlik shen tapsyrdy. Qazaqstan Prezıdentiniń qolynan 12 túlek – Qorǵanys mınıstrligi Qurlyq áskerleri áskerı ınstıtýtyn, Ishki ister mınıstrligi Ulttyq gvardııasynyń áskerı ınstıtýtyn, Ulttyq qaýipsizdik komıtetiniń áskerı ınstıtýtyn úzdik bitirýshiler pogon aldy.
Eń aldymen, Memleket kúzet qyzmeti úrmeli aspaptar orkestriniń súıemeldeýimen Memlekettik tý ákelinip, el Ánurany shyrqaldy. Budan keıin sharaǵa qatysýshylarǵa arnaǵan sózinde Qazaqstan Prezıdenti Memlekettik tý kóterilip, Ánuran oryndalǵan saıyn árbir qazaqstandyqtyń aıryqsha sezimge bólenetinin aıtty. «Bul – bárimizdiń ortaq tabysymyzǵa, táýelsiz eldiń batyl qadamyna degen maqtanysh. Búginde búkil álem úshin bul baıraq – tabysty memlekettiń jáne bizdiń ulttyq birligimizdiń sımvoly. Qazaqstannyń týynda altyn kún beınelengen, sol kún men máńgilik aspan astynda ulan-baıtaq dalamyz kósilip jatyr. Taıaýda osy baıraq dúnıejúzilik «EKSPO-2017» kórmesiniń ajaryn ashatyn bolady. Tý kóterý arqyly aldaǵy Olımpııa oıyndary men ózge de sport jarystarynda elimizdiń áli talaı jeńisteri áspetteletinine senimdimin. Baıraq memlekettiligimizdi saqtaý, ony nyǵaıtý kerektigin kún saıyn esimizge salyp turady», – dedi Nursultan Nazarbaev.
Memleket basshysy joǵary áskerı oqý oryndarynyń túlekteri ofıserlik ataq alǵan soń mártebeli jáne jaýapty jańa jolǵa túsetinin aıtty. «Ofıser – bul, eń aldymen, borysh, sodan keıin – mamandyq. Ofıserlik boryshty minsiz atqarý erlikti, bıik moraldyq qasıetterdi, tártip pen tabandylyqty qajet etedi. Jas jaýyngerlerdi, ózderińnen jasy kishi baýyrlaryńdy tárbıeleý, olarǵa qamqorlyq kórsetý – sizderdiń únemi qaperde ustaıtyn mindetterińiz. Bul úshin boılaryńyzdan bıik adamgershilik qasıetter tabylýy tıis. Qazaq jeriniń tarıhy batyr uldardyń erligine toly. Taıaýda ǵana biz ardagerlerge Uly Jeńistiń 70 jyldyǵyna baılanysty qurmet kórsettik», – dedi Qazaqstan Prezıdenti.
Nursultan Nazarbaev jyl saıyn ótetin Memlekettik tý kóterý dástúrli rásimi Astana kúnine arnalǵan merekelik sharalardyń bastaýy ekenine nazar aýdardy. «Astana – elimizdiń barsha azamattarynyń ortaq jáne shabytty eńbeginiń jemisi. Olar Qazaqstan ǵana emes, búkil álem maqtan tutatyn týǵan elordasyn salý úshin respýblıkanyń túkpir-túkpirinen keldi. Sondyqtan Astana kúni – ár otbasynyń, árbir qazaqstandyqtyń júregine jaqyn mereke. Bul qalada ýaqyttyń qan tamyry eki ese jıi soǵady, elorda kórki jyl saıyn ózgerip keledi. Búginde qala aldynda elimizdi jańa bıikterge bastaıtyn budan da zor maqsattar tur. Osy tamasha merekeni atap óte otyryp, biz halqymyzdyń eńbekqorlyǵy men tabandylyǵyn, kúsh-qýatyn dáripteımiz», – dedi Nursultan Nazarbaev.
Memleket basshysy, sonymen qatar, elimizdiń barlyq joǵary áskerı oqý oryndarynyń túlekterin quttyqtady. «Bul – jas ofıserler úshin aıryqsha qýanyshty kún. Sizder kóp jumys istep, eńbektendińizder, osy maqsatqa jetý úshin kúresip, jeńiske jettińizder. О́z ómirlerińizdi áskerı iske arnaýǵa sheshim qabyldadyńyzdar. Otanyńa qyzmet etý ońaı mindet emes jáne oǵan árkimniń shamasy jete bermeıdi. Alǵan bilimdi elińe qyzmet etý, qoǵamǵa jáne otbasyńa paıda ákelý, halyqtyń birligin saqtaý úshin paıdalaný qajet», – dedi Qazaqstan Prezıdenti.
Sóziniń sońynda Nursultan Nazarbaev barsha qazaqstandyqtardy Astana kúnimen quttyqtap, árbir shańyraqqa baq-bereke tiledi.
Bul kúngi saltanatty shara barysynda patrıottyq kompozısııalar men áskerı marsh oryndaldy
.
Láıla EDILQYZY,
«Egemen Qazaqstan».
Sýretterdi túsirgender
S.BONDARENKO, B.OTARBAEV
