Vashıngtonda Astana kúni atap ótildi

Jaqynda Qazaqstannyń Vashıngtondaǵy elshiliginde Astana kúni qurmetine qabyldaý ótip, oǵan elimizdiń 100-den astam dostary – Amerıkanyń qoǵamdyq, isker, saraptama toptarynyń jáne jergilikti BAQ ókilderi qatysty. Is-shara barysynda «Amazon.com» onlaın dúkender jelisinde bestseller atanyp, bıyl «Moritz Thomsen Peace Corps Experience» júldesine ıe bolǵan «Qazaq dalasynyń úıleri: Álem korpýsy qyzmetkeriniń estelikteri» (At Home on the Kazakh Steppe: A Peace Corps Memoir) kitabynyń tusaýkeseri ótti. Vermont shtatynyń turǵyny kitap avtory Djanet Gıvens 2000-jyldardyń basynda Qazaq­stanǵa aǵylshyn tiliniń oqy­týshy mamany retinde kelgen kez­deri jaıly jyly lebiz­di estelikterimen bólisý úshin AQSh astanasyna arnaıy kel­di. Ol Qazaqstan halqynyń baýyrmaldyq, qonaqjaılylyq qasıetterin atap ótip, óz shyǵar­masynan «darhan kóńildi qazaq halqynyń qonaqjaılylyǵy men jyly qushaǵyn seziný úshin» oqyrmandaryn Qazaqstandy baryp kórýge shaqyratyn úzindilerin oqydy. Kelgen qonaqtar Qazaq eliniń bolmysyn ǵana emes, sondaı-aq, onyń qarqyndy damýy men jas Astananyń ósip-órkendeýi týraly mol maǵlumattar aldy. Olar elimizdiń maqsatqa jetý jolyn­daǵy tabandylyǵyn, aqyl-oı kóre­gendigin, bolashaqqa degen nyq seni­min, saıası turaqtylyq jáne je­del ekonomıkalyq ósimin Mem­leket basshysynyń danagóı, kóre­gen saıasatymen baılanysty­ryp, joǵary baǵalady. Eldiń «100 naq­ty qadam», «Nurly Jol», «EKSPO-2017», «Qazaqstan-2050» sekil­di bastamalary onyń «vızıtti kar­toch­ka­syna» aınaldy. As­tana týraly derekti fılm jınal­ǵandardyń Qazaqstannyń jarqyn bolashaǵyna senimin rastady. Amerıkalyq qonaqtar búkil qazaqstandyqtardy jáne Elbasyn táýelsiz Qazaqstannyń beınesine aınalǵan Astananyń tańǵalarlyq tabystarymen quttyqtap, ósip-órkendeýine tilekterin bildirdi. «Egemen-aqparat».