«Eır Astana» áýe kólikteri EKSPO-2017 logotıpimen ushady

EKSPO-nyń birneshe negizgi maqsaty bolsa, onyń basynda týrızmdi damytý da bar. Qazaqstanǵa keletin týrıster sanyn arttyrý arqyly týrızmdi tabys kózine aınaldyrý álmısaqtan arman. Al aldaǵy kórmege eki mıllıonnan astam jergilikti jáne sheteldik týrıster keledi dep boljam jasalyp jatqany belgili. – Bul – naqty boljam, naqty sandar. «Astana EKSPO-2017» ulttyq kompanııasy birneshe álemdik týroperatorlarmen kelisimshart jasap úlgerdi. Olar óz kezeginde, 2017 jyly Qazaqstanǵa týrlardy satatyn bolady. Bul rette, pakettik týrlar EKSPO+Býrabaı, EKSPO+Almaty jáne basqa baǵyttar usynylady, – deıdi «Astana EKSPO-2017» kompanııasynyń Qoǵammen baılanys departamentiniń dırektory Sergeı Kýıanov. Sonymen jaqynda Almaty áýejaıynda «Embraer 190» ushaǵyna Astana EKSPO-2017 kórmesiniń logotıpi ornalastyryldy. Bul bort – kórme logotıpimen brendtelgen alǵashqy ushaqtardyń biri. Osynaý bastama «Astana EKSPO-2017» UK»AQ pen «Eır Astana» AQ arasynda qol qoıylǵan yntymaqtastyq memorandýmynyń aıasynda júzege asyrylyp otyr. Aldaǵy ýaqytta EKSPO logotıpi kompanııa áýe parkindegi 30 ushaqqa qoıylatyn bolady. «Eır Astana» «EKSPO-2017 kórmesiniń resmı tasymaldaýshysy» eksklıýzıvti mártebege ıe jáne «Astana EKSPO-2017 halyqaralyq kórmesiniń resmı seriktesi bolyp tabylady. Bul memorandýmǵa aǵymdaǵy jyldyń 17 tamyzynda «Astana EKSPO-2017» ulttyq kompanııasynyń basqarma tóraǵasy Ahmetjan Esimov pen «Eır Astana» áýe kompanııasynyń prezıdenti Pıter Foster qol qoıǵan bolatyn. Kelesi jyldyń basynan seriktester halyqaralyq deńgeıde kórmeni ilge­riletýge qatysty arnaıy naýqandy júzege asyrýdy bastaıdy dep kútilip otyr. «Eır Astana» áýe kompanııasynyń qazirgi tańda seriktestik júıesi, oǵan qosa 40 000 agentteri bar. Sondaı-aq, áýe kompanııasynyń tranzıttik jolaýshylary kórme ótkiziletin kúnderi kórmeni tegin tamashalaı alady. Astanadaǵy kórme «jasyl» energetıka aıasynda ótedi, sondyqtan energotutyný, energotıimdi tehnologııalardy paıdalaný máseleleri is-sharanyń basty taqyrybyna aınalmaq. «Eır Astana» prezıdenti Pıter Forsterdiń aıtýynsha, aýaǵa zalaldy qaldyqtardyń shyǵarylýyn barynsha azaıtý kompanııanyń basymdylyqtaryna jatady. Sońǵy áýeshoýda Le Býrje qozǵaltqyshy zııandy shyǵyndy 15 paıyzǵa qysqartatyn NEO býynyna jatatyn Airbus A320 satyp alý nıetimen bólisken edi. Aınash ESALI, «Egemen Qazaqstan». ALMATY.