Jol kartasynyń bekitilgenine eki jyl toldy. Ahýal qandaı?

Májiliste palata spıkeri Qabıbolla Jaqypovtyń tóraǵalyǵymen ótken jalpy otyrysta depýtat Rozaqul Halmuradov Bilim jáne ǵylym mınıstri A.Sárinjipovke depýtattyq saýal joldady. Onda bylaı delinedi: «Qazaqstan Respýblıkasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynda 2020 jylǵa qaraı memlekettik tildi biletin qazaqstandyqtardyń sanyn 95 paıyzǵa deıin jetkizý, mektep biti­rýshilerdiń 100 paıyzy memlekettik tildi meń­gerýi kerek degen mindet qoıylǵan. Memlekettik baǵdarlamadaǵy osy nysanaly ındıkatorlardy iske asyrýdyń bir tetigi retinde Qazaqstan Respýblıkasy Bilim jáne ǵylym mınıstrligi tarapynan elimizdegi qazaq tilinen basqa ulttyq tilderde oqytatyn mektepterde kóptildi jáne bılıngvaldi bilim berýdi engizýdiń 2013-2015 jyldarǵa arnalǵan jol kartasy bekitilgen bolatyn. Onda atalǵan mektepterde negizgi pánder bir mezgilde bir sabaq ústinde eki nemese úsh tilde júrgizilýi nemese keıbir pánderdiń qazaq tilinde oqytylýy qarastyrylǵan. Bul ádis Ońtústik Qazaqstan oblysy, Saıram aýdanyndaǵy Iý.Saremı atyndaǵy ózbek tilinde sabaq beretin mektep-gımnazııanyń tájirıbesinde oń nátıje bergen. Kóptildi jáne bılıngvaldi bilim berý týraly jol kartasy bekitilgenine eki jyl toldy. О́tken ýaqyt ishinde elimizde qazaq tilinen basqa tilderde oqytatyn oblystar, Astana jáne Almaty qalalary boıynsha qansha mektep bar, solardyń qanshasynda qaısy pánderdi qazaq tilinde oqytý qolǵa alyndy? Kóptildi jáne bılıngvaldi oqytý ádistemesi bilim berý memlekettik standartyna ıntegrasııalanǵan ba? Osy ádispen oqytatyn muǵalimderdiń bilik­tiligin arttyrý, olardyń eńbegin yntalandyrý máseleleri qalaı sheshilgen? Jalpy, 2020 jylǵa qaraı mektep biti­rý­shilerdiń 100 paıyzy memlekettik tildi meńgerýi úshin qandaı is-sharalar atqarylýda? Osy depýtattyq saýalǵa «Qazaqstan Respýb­lıkasynyń Parlamenti jáne onyń depý­tat­tarynyń mártebesi týraly» Qazaqstan Respýb­lıkasy Konstıtýsııalyq zańynyń 27-babyna sáıkes jazbasha jaýap berýińizdi suraımyn».