Shyǵys Qazaqstanda shaǵyn mektepter jabylmaıdy

О́SKEMEN. 5 shilde. Shyǵys óńiriniń bilim berý júıesinde apattyq mektepter, úsh aýysymmen oqytý jáne mektepke deıingi bilim berý máseleleri sheshilýde. Bıyl 18 mektepti paıdalanýǵa engizý josparlansa, onyń 11-i apattyq mektepterdiń ornyn almastyrmaq. Atalǵan másele óńir basshysy Danıal Ahmetovtiń qatysýymen ótken oblystyq máslıhattyń kezekti HHIX sessııasynda aıtyldy. Bul týraly egemen.kz habarlady. Ulttyq qor esebinen úsh mektep pen balabaqshanyń qurylysy bastalady. Zyrıan, Besqaraǵaı, Kúrshim, Katonqaraǵaı, Ulan jáne Kókpekti aýdandaryndaǵy aýyldyq jerlerde oqýshylar ornynyń barynsha kóptigi baıqalady. Kerisinshe, mektepke deıingi balalar mekemelerinde 25 myńǵa jýyq oryn jetispeıdi. Oryn jetispeýshiligin qysqartý úshin jyl sońyna deıin bıýdjet qarajaty esebinen 5, jekemenshik – 15, memlekettik-jekemenshik áriptestik sheńberinde 11 balabaqshanyń qurylysy josparlanýda. «Men shaǵyn komplektili mektepterdi jabýdy qup kórmeımin. Sebebi, ol jerde de ómir bar. Búgin mektep jabylsa, erten aýyl qurıdy. Sony oılaý kerek. Sodan keıin Semeıde «Jas ulan» er balalar arnaıy mektep lıseıi, Shákerim gımnazııalary bar. Barlyq jaǵdaı jasalǵan. Alaıda, UBT boıynsha baldary óte tómen. Jyl saıyn qarjy bólemiz, al bilim sapasy jaqsarmaıdy. Nege? Mysaly, qazaq tilin tereńdetip oqytatyn mektepter bar, al olardyń balalary qazaqsha durys bilmeıdi. Bul másele aǵylshyn, nemis, fransýz tilderin tereńdetip oqytatyn mektepterge de qatysty. Bilim basqarmasy jumysyn durys atqarsa, bulaı bolmas edi», – dedi Danıal Ahmetov. Oblys ákimi atalǵan másele boıynsha komıssııa qurýdy tapsyrdy. Dýman Anash. Derek, sýret: egemen.kz.