Aıtýly data Ulan-Batyrda ataldy

Jaqynda Ulan-Batyrda Qazaqstannyń Mońǵolııadaǵy elshiligi Mońǵolııa Ǵylym akademııasynyń janyndaǵy Halyqaralyq qatynastar ınstıtýtymen birlese otyryp, «Qazaq handyǵyna – 550 jyl: Qazaqstan-Mońǵolııa tarıhynyń ózekti máseleleri» taqyrybynda dóńgelek ústel uıymdastyrdy. Shara barysynda Qazaq handyǵynyń qurylýy tarıhynyń negizgi aspektileri talqylanyp, Qazaqstan men Mońǵolııa memle­ketteriniń damý tarıhy, sondaı-aq, bolashaq urpaq úshin ulttyq birlikti saqtaý máseleleri týraly pikir almasyldy. Dóńgelek ústel jumysyna ál-Farabı atyndaǵy Qazaq ulttyq ýnıversıtetiniń ǵalymdary, tarıh ǵylymdarynyń doktorlary, professorlar Toqta­mys Jumaǵulov pen Gúlnar Meń­diqulova, Mońǵolııanyń ǵylymı-zertteý mekemeleri, sondaı-aq, jergilikti BAQ ókilderi qatysty. Qazaqstannyń Mońǵolııadaǵy elshisi Qalybek Qoblandın sha­ra­nyń memleketter tarıhyn te­re­ńirek zertteýdegi alar orny­na toqtalyp, túrki-mońǵol ımperııa­­sy, Altyn Orda, qazaq-mońǵol ta­rı­hı sabaqtastyǵyn taratyp aıtty. Mońǵolııa Ǵylym akade­mııa­synyń janyndaǵy Halyqaralyq qatynastar ınstıtýtynyń dırektory J.Baıasah atalǵan shara­lardyń uıymdastyrylýy qazaq tarıhy, jalpy mońǵol-qazaq tarıhynyń damýy týraly túsinikti keńeıtetindigine toqtaldy. Onyń pikirinshe, bul sharalar eki el arasyndaǵy gýmanıtarlyq-mádenı salalardaǵy qarym-qaty­nastardyń ilgerileýine oń yqpalyn tıgizbek. Mońǵolııa Memlekettik Uly Hýraly (parlament) depýtaty Aǵyparyn Bákeı Qazaq han­dy­ǵy­nyń 550 jyldyǵy aıasyndaǵy sha­ranyń mańyzdylyǵyna toqtala kele, tarıhy tereńnen bastala­tyn mońǵol-qazaq qoǵamy qatynas­tary qazirgi tańda berik ekonomıka­lyq, ǵylymı, mádenı jáne rýhanı baılanystarynyń turaqty túrde damýda ekendigin jetkizdi. Tarıh ǵylymdarynyń doktory Oohnoı Batsaıhannyń qazaqtyń birtýar uly, partııa jáne memleket qaıratkeri Turar Rysqulov týraly bildirgen pi­kiri qatysýshylardyń nazaryn ózine aýdardy. Mońǵol ǵalymy T.Rysqulovtyń bastamasymen Mońǵolııa astanasynyń Ulan-Batyr (aýdarmasy «Qyzyl batyr») dep atalǵanyna nazar aýdara otyryp, Mońǵolııa memleketi tarıhyndaǵy onyń alar róline joǵary baǵa berdi. Dóńgelek ústel nátıjesinde eki el ǵylymı top ókilderi sha­ranyń Qazaqstan men Mońǵolııa tarıhynyń ózekti máselelerin talqylaýda paıdaly alań bol­ǵandyǵy týraly ortaq pikirge kel­di. Atalǵan syndarly jáne jan-jaqty taldaýlar memleket­ter ara­syndaǵy dostyq pen ózara senim negizindegi qarym-qatynastardyń odan ári ilgerilep, damýyna ıgi yqpalyn tıgizetindigi týraly qorytyndy jasaldy. «Egemen-aqparat».