Soǵysqa Jambyl aýdanyndaǵy taý etegine kólbeı oryn tepken Aqterek aýylynan 300-den asa er azamat attanady. Alaıda, týǵan jerdiń dám-tuzyn tatýdyń baqyty tek 120-syna ǵana buıyrady. Qalǵan 197-si el qorǵaýda Otan úshin sheıit bolady. Jeńistiń 60 jyldyǵyna oraı aýyldyń ortalyq saıabaǵynda osy óńirdiń bas kóterer azamattary elge oralmaǵan sol bozdaqtardy el esinde qaldyrý maqsatynda eskertkish ornatyp, memorıaldy taqtaǵa esimderin qashap jazǵan edi. Endi, mine, Jeńistiń 70 jyldyq aıtýly merekesine oraı aqterektikter qol qýsyryp otyrmaı, sol maıdannan aman-esen elge oralyp, beıbit ómirde eńbek etken 120 soǵys ardageriniń esimin ardaqtap, máńgilik este qaldyrý maqsatynda ortalyq saıabaqtaǵy memorıaldy eskertkish aldynan mármár tasqa esimderin jazdyryp, eskertkish taqta ashty.
Saltanatty is-sharany Aqterek aýyldyq okrýginiń ákimi Dosan Ábdijanov ashyp, 1941-45 jyldary Otanǵa qaýip tóngende Aqterek aýylynan maıdanǵa attanyp, surapyl soǵystan aman-esen elge oralǵan, odan keıin de eńbekke aralasyp, aýyldyń ósip-órkendeýine óz úlesterin qosqan aǵalarǵa urpaq atynan taǵzym jasaý úshin eskertkish taqtany ornatqandaryn, sonymen qatar, búginde aýylda soǵys jyldary tylda eńbek etken 46 ardager turatynyn, olarǵa Jeńistiń 70 jyldyǵyna Úkimetten arnaıy estelik medal tapsyrylǵanyn jetkizip, aýyldastaryn úlken merekemen quttyqtady. Aqterek jeke sharýashylyq tóraǵasy, «Qurmet» ordeniniń ıegeri Temirlan Shaınúsipov aýylymyzda búginde Otan soǵysyna qatysqan eń sońǵy ardagerimiz Ospanqul atamyzdyń dúnıeden ótkenine úsh jyldyń júzi boldy. Biraq soǵysqa qatyspasa da jeńisti jaqyndatýǵa qatysqan tylda eńbek etken apa-aǵalardy uly merekemen quttyqtaımyn. Soǵystan keıingi 1950-1960-jyldary týǵan bizder ózimizdi baqytty urpaq dep esepteımiz. Sebebi, Keńes Odaǵy kezinde de, Qazaqstan egemendigin alǵan kezeńde de jaqsy ómir súrdik. Bul Elbasynyń, sosyn qazaǵymyzdyń yntymaǵy men bereke-birliginiń arqasy, dedi. Al Aqterek orta mektebiniń dırektory Roza Jamantaeva Jeńistiń 70 jyldyǵyna arnalǵan is-sharalar keshegi Keńes Odaǵyna kirgen memleketterde ǵana emes, ekinshi dúnıejúzilik soǵysqa qatysy bar elderde de atap ótilip jatqanyn, Aqterek aýyly da sol elderdiń bir bólshegi bolǵandyqtan, osy aıtýly merekeni atap ótýde mektepte aýqymdy is-shara ótkenin, endi soǵys bolmasyn, búgingi bizdiń balalarymyz Qazaqstannyń kók týyn jelbirete bersin degen tilek bildirdi. Bir aıta keterligi, ásirese, mektep oqýshylary merekeni atap ótýge erekshe daıyndyqpen kelipti. «О́shpeıdi dańqyń jańǵyryp...», «Erlikke taǵzym», «Júrekte qaldy máńgilik», «Jeńisti jaqyndatqan ardagerler» atty foto-stendter, sondaı-aq, ár synyp oqýshylary soǵystan aman-esen kelgen 120 ardagerdiń derekterin jınastyryp, jeke-jeke albom jasaýy kórmeniń sánin keltirip turdy. – Sheshemniń soǵys kezindegi basynan ótkizgen beınetin oılaǵanda júregim qan jylaıdy, – dedi Náshirbek aǵa. – Qas qaraıa jumystan keledi de jalǵyz kóılegin sheship, kıimin jýyp, ilip qoıady da, ertesine kıip, tań bilinbeı jumysqa ketedi. Olardy baqylap otyrǵan Stalın de, Goloshekın de joq. Kórdińiz be, ýaqyttyń qataldyǵyn. Tártip solaı. О́ıtkeni, Otan úshin soǵysyp, jan berip jatqan maıdangerlerge tamaq, kıim-keshek kerek. Bir dándi qaldyrmaı soǵysqa jiberedi. Qazir keremet zaman ǵoı, Aqteregimiz gúldenip tur. Qandaı qıyn ýaqyt bolsa da aýylymyzda bir úı buzylǵan joq, qaıta bir úlken kóshe tústi. Aýylymyzǵa aýyzsý kelip jatyr. Máselen, maǵan eki jarym aıdyń ishinde keń de jaryq úı salyp berdi. Ne sý izdetken joq, ne qum izdetken joq. Jalǵyz maǵan emes, búkil Aqterek aýylynyń turǵyndaryna úı salyp otyr. Aýylymyzdyń kóshesi qandaı taza. Ol – kimniń arqasy. Ol – basshynyń arqasy. Ol aýyl azamattarynyń, ásirese, Temirlannyń azamattyǵy. Al Qazaqstannyń gúldenip turǵany Nursultan Nazarbaevtyń arqasy. Urpaǵymyz ımandy. Týǵan jerge týyńdy tik degen, aýyldastarynyń osyndaı ıgi isine rıza bolǵan aýyldyń aqsaqaldar alqasynyń tóraǵasy Beken Qojabergenov aǵamyz da osy sharany uıymdastyrǵandarǵa rahmet aıta kelip, soǵystan oralǵan baýyrlarymen birge jumys istegenin, olardyń soǵysta da, beıbit ómirde de erlik jasaǵandaryn tilge tıek etti. Is-shara barysynda qandy qyrǵyn soǵysty tunshyqtyryp, urpaǵyna baqyt ákelgen ardagerlerimizge myń alǵys bildirgen mektep oqýshylary kórinister kórsetip, shaǵyn konserttik baǵdarlamalaryn usyndy. Shara sońynda tyl ardagerlerine arnaıy dastarqan jaıylyp, marqumdardyń rýhyna arnap Quran baǵyshtaldy.
Gúlzeınep SÁDIRQYZY, «Egemen Qazaqstan».
Almaty oblysy.
