«Barys» Máskeýde jergilikti «Dınamodan» basym tústi

ASTANA. 20 qazan. Búgin, 19 qazannan 20-syna qaraǵan túni Qurlyqtyq hokkeı lıgasy sheńberinde Astananyń «Barysy» Máskeýde jergilikti «Dınamomen» kezdesip, 2:1 esebimen jeńiske jetti. Bul týraly egemen.kz habarlady. Alǵashqy kezeń aıdyn ıeleriniń basymdyǵymen ótti. Tolassyz shabýyldaǵan dınamolyqtar bul bólikte bizdiń qaqpaǵa 14 soqqy jasasa, «Barys» hokkeıshileri 4 soqqymen ǵana jaýap berdi. Nátıjesinde úziliske bir mınýt qalǵanda Met Robınsonnyń kómegimen máskeýlikter esep ashty. Ekinshi kezeń teń jaǵdaıda órbidi. Degenmen, «Barystyń» urymtal sátteri qarsylasyna qaraǵanda kóbirek bolǵanyn aıta keteıik. Sońǵy kezeńde de osy qarqynynan taımaǵan Evgenıı Koreshkovtyń shákirtteri 47-mınýtta tarazy basyn teńestirdi. Talǵat Jaılaýovtyń asyrǵan shaıbasyn qaqpaǵa týra baǵyttaǵan Vadım Krasnoslobodsev bolatyn. Gol jiberip alǵannan keıin «Dınamo» shabýylyn kúsheıtip, taıly-tuıaǵymen alǵa umtyldy. Sonyń saldarynan qorǵanysy aıtarlyqtaı syr berdi. Osyny tıimdi paıdalanǵan astanalyqtar qarymta shabýylǵa ǵana ıek artýdy jón sanady. Bul taktıka 52-mınýtta óz jemisin berip, Naıdjel Doýs esepti eseledi. Qalǵan ýaqytta reseılikter qansha shabýyldasa da tablodaǵy kórsetkish ózgergen joq. Osylaısha, «Barys» bıylǵy maýsymdaǵy 8-shi jeńisine qol jetkizip otyr. Búginde 24 oıynnan 29 upaı jıǵan bizdiń komanda Shyǵys konferensııasynda 12-orynda keledi. Al 22 kezdesý ótkizip, 41 upaı enshilegen «Dınamo» Batys konferensııasynda 4-orynda tur. «Barys» kelesi kezdesýin 21 qazanda syrt aıdynda Bratıslavanyń «Slovan» komandasymen ótkizedi. Elaman Qońyr. Derek: egemen.kz. Sýret: dynamo.ru.