Elbasy Qytaıdyń isker jáne qarjylyq toptar ókilderimen kezdesti

ASTANA. 1 qyrkúıek. Memleket basshysy Qytaı Halyq Respýblıkasyna memlekettik sapary aıasynda jergilikti isker jáne qarjylyq toptar ókilderimen kezdesti. Bul týraly akorda.kz habarlady. Is-sharaǵa «Hýaveı» korporasııasy basqarmasynyń tóraǵasy Sýn Iаfan, «Sınhýa» korporasııasy basqarmasynyń tóraǵasy Ho Sınhýa, Azııa ınfraqurylymdyq ınvestısııalar bankiniń kópjaqty ýaqytsha hatshylyǵynyń bas hatshysy Szın Lısıýn, «SITIK Grýpp» korporasııasy dırektorlar keńesiniń tóraǵasy Chan Chjenmın, Qytaı memlekettik damý bankiniń prezıdenti Chjen Chjısze jáne Qytaıdyń basqa da jetekshi kompanııalarynyń basshylary qatysty. Kezdesý barysynda Prezıdent mundaı kezdesýler men pikirlesýler ekijaqty qarym-qatynasty odan ári damytý úshin qajet ekenin aıtty. «Bul sapardy Qazaqstan-Qytaı baılanystaryndaǵy betburysty kezeń dep sanaımyn. Biz Qytaımen negizinen energetıka jáne resýrs óndirý salalarynda 20 jyldan astam belsene yntymaqtasyp keldik. Endi jańa kezeńde ekonomıkanyń óńdeý, sonymen birge mashına jasaý jáne resýrsty qaıta óńdeý sektorlaryndaǵy ózara is-qımyldy kúsheıtýge kirisemiz. Keshe QHR tóraǵasy Sı Szınpınmen ótken syndarly kelissózder barysynda 45 birlesken nysan ashý jóninde ýaǵdalastyq. Sonyń 25-i boıynsha jalpy quny 23 mıllıard dollardyń kelisimine qol qoıyldy, – dedi Nursultan Nazarbaev. Aıdar О́risbaev. Derek, sýret: akorda.kz.