Mádenıet jáne sport mınıstri boksshy Golovkındi jeńisimen quttyqtady

ASTANA. 19 qazan. Keshe AQSh-tyń Nıý-Iork qalasynda otandasymyz, boksshy Gennadıı Golovkın kanadalyq Davıd Lememen judyryqtasyp, 34-jeńisine qol jetkizdi. Osyǵan oraı elimizdiń Mádenıet jáne sport mınıstri Arystanbek Muhamedıuly jerlesimizdi jarqyn jeńisimen quttyqtady. Bul týraly Mádenıet jáne sport mınıstrligi sport jáne dene shynyqtyrý isteri komıtetiniń baspasóz qyzmeti habarlady. Quttyqtaý jedelhatynda: «Sizdiń bul jeńisińiz Qazaqstan boks mektebiniń álem boıynsha úzdikter qatarynda ekenin taǵy bir dáleldedi. Biz sizdiń osyndaı jarqyn jeńisterińizdi maqtan tutamyz! Siz, táýelsiz Qazaqstan sporty úshin mańyzy asa joǵary bıikterdi baǵyndyrdyńyz. Kásipqoı rıngtegi sheberligińiz Qazaqstan sportynyń dańqyn burynǵydan da asqaqtata tústi. Al ataqty Madison Square Garden arenasynda orta salmaqta IBF tujyrymy boıynsha chempıondyq beldiktiń ıegeri bolǵan kanadalyq Davıd Lemeni jeńýińiz barsha qazaqstandyqtarǵa tamasha kóńil-kúı syılady. Bul jeńis óskeleń urpaqtyń Otanǵa degen súıispenshiligin arttyryp, patrıottyq sezimin týdyrady. Qazaqstan boksynyń jankúıerleri aldaǵy ýaqytta sizden tek osyndaı jarqyn jeńister men qyzyqty jekpe-jekter kútedi. Jeńisińiz qutty bolsyn!», – delingen. Aıta keteıik, atalǵan aıqas nátıjesinde bizdiń saıypqyran 8-raýndta qarsylasyn tehnıkalyq nokaýtpen jeńip, orta salmaqta WBA (Super), IBO jáne WBC (Interim) tujyrymy boıynsha chempıondyq ataǵyn qorǵap qana qoımaı, qarsylasyna tıesili bolǵan IBF nusqasynyń chempıondyq beldigin ıemdendi. Elaman Qońyr. Derek: Mádenıet jáne sport mınıstrligi sport jáne dene shynyqtyrý isteri komıtetiniń baspasóz qyzmeti. Sýret: vk.com.