Qytaıda Qazaqstannyń BAQ ókilderine arnalǵan brıfıng ótti

ASTANA. 1 qyrkúıek. Memleket basshysy Qytaıda Qazaqstannyń buqaralyq aqparat quraldary ókilderine arnalǵan brıfıng ótkizdi. Bul týraly akorda.kz habarlady. Brıfıng barysynda Elbasy QHR-ǵa memlekettik sapardyń mańyzy joǵary ekenin atap ótti. «Álemdik ekonomıka daǵdarysty bastan ótkerip jatqan búgingi ýaqytta álemdik qarjy ınstıtýttarynyń ınvestısııalyq múmkindikteri aıtarlyqtaı azaıdy. Osyndaı jaǵdaıda Qytaımen ózara is-qımyl biz úshin kúrdeli kezeńdi eńserýdiń qolaıly múmkindigi bolyp sanalady», – dedi Qazaqstan Prezıdenti. Nursultan Nazarbaev sondaı-aq jýrnalısterge QHR tóraǵasy Sı Szınpınmen kezdesý barysynda jasalǵan ekijaqty kelisimder týraly aıtyp berdi. Solardyń ishindegi eń iri jobalarda Pavlodar alıýmınıı zaýytynyń óndiris qýatyn 150 myń tonnaǵa jetkizý, Mańǵystaý oblysynda munaı-gaz jabdyqtaryn shyǵaratyn zaýyt qurylysyn salý qarastyrylady. Prezıdent sapardyń ózge de qyrlaryna toqtala kelip, ekinshi dúnıejúzilik soǵystyń núktesi naq osy Qytaıda qoıylǵanyn atap kórsetti. Nursultan Nazarbaev Qazaqstandaǵy mańyzdy oqıǵaǵa da toqtalyp, depýtattardy Parlament sessııasynyń ashylýymen quttyqtady. «Men bizdiń parlamentshilerge tabys tileımin, olarǵa Bes ınstıtýsıonaldyq reformany zańnamalyq turǵydan qamtamasyz etý úshin belsene jumys isteýge týra keledi. Jyl aıaǵyna deıin 57 zańnamalyq akt qabyldaý josparlanýda. Bizdiń parlamenttik fraksııalar bul mindetke zor jaýapkershilikpen qarap, eldegi mańyzdy jańǵyrtý isine óz úlesin qosady dep oılaımyn», – dedi Qazaqstan Prezıdenti. Sonymen qatar, Memleket basshysy qazaqstandyqtardy Bilim kúnimen quttyqtady. «Búgin 7,5 myń mektep 2,6 mıllıon balaǵa esigin ashty, sonyń 300 myńy – birinshi synyp oqýshylary. Biz árbir birinshi synyp oqýshysyna meniń jeke quttyqtaýymmen birge Otanymyz týraly kitap syıladyq», – dedi Nursultan Nazarbaev. Aıdar О́risbaev. Derek, sýret: akorda.kz.