El tilegi eskerildi. Bul – barshanyń qalaýy
Nursultan Nazarbaevtyń Prezıdent saılaýyna kandıdat bolyp usynylýyna oraı otandastarymyzdyń ortaq oıy osyndaı
Kezekten tys prezıdenttik saılaý merzimi jaqyndaǵan saıyn elimizdegi saıası kúshter belsendilik tanyta bastady. Buǵan deıin eki saıası partııa óz quryltaılaryn ótkizse, keshe solardyń qataryna Qazaqstannyń «Aq jol» demokratııalyq partııasy qosyldy. Iаǵnı, atalǵan partııanyń HII sezi ótip, onda kezekten tys prezıdenttik saılaý boıynsha partııanyń ustanymy qaraldy. Esildiń sol jaǵalaýynda ornalasqan «Aq jol» partııasynyń Ortalyq ofısinde ótken quryltaıǵa elimizdiń 16 óńirinen partııalyq konferensııada saılanǵan 121 delegat kelipti. Sonyń 118-i partııalyq jıynda tóbe kórsetse, qalǵan 3-ýi belgili sebeptermen qatysa almady. Saılanǵan delegattardyń ókilettikteri rastalǵan soń, olardyń quramy qoǵamnyń ártúrli taby men tobynan ekeni belgili boldy. Aldymen sóz alǵan «Aq jol» partııasynyń tóraǵasy Azat Perýashev kelesi jyly prezıdenttik jáne parlamenttik saılaýdyń qatar kelýine sarapshylar byltyrdan bastap nazar qoıa bastaǵanyn erekshe atady. El Konstıtýsııasynyń 41-babynyń 3-tarmaǵy bul saılaýlardy birge ótkizýge múmkindik bermeıtini aıtyldy. Osyǵan oraı sózinde partııa basshysy óz oıyn bylaısha órbitti: «Bizdiń saıası júıede prezıdent ınstıtýty ólsheýsiz joǵary turǵanyn moıyndaýymyz kerek, óıtkeni, dál osy ınstıtýt memlekettik damýdyń baǵytyn jáne qarqyndaryn aıqyndaıdy. Sol sebepti, Qazaqstan halqy Assambleıasy prezıdenttik saılaýdy keıinge qaldyrmaı ótkizýdi usyndy». A.Perýashev, sonymen qatar, kezekten tys saılaý ótkizýdiń astarynda otandyq ekonomıkaǵa syrtqy qaýipterdiń bolýy, bıznestiń rynokty joǵaltýy, bankterde qolma-qol teńgeniń kemýi sııaqty keleńsizdikterdiń oryn alýy múmkindigimen túsindirýge tyrysty. Bul rette, tóraǵa geosaıası qaýipterdiń oryn alýy faktorlarynyń da joq emestigine nazar aýdartty. Osyndaı syrtqy turaqsyzdyqtar: Taıaý Shyǵys, Eýropa jáne Ýkraınada oryn alýda. Ásirese, Qazaqstan úshin Aýǵanstannan eki aı buryn halyqaralyq koalısııalyq kúshterdiń áketilýimen aımaqta kıkiljińder oryn alyp, elimiz shekarasy mańynda tynyshtyq buzylýy múmkindigi de atalmaı qalǵan joq. «Osylaısha, kezekten tys saılaý ótkizý týraly sheshim – taktıkalyq tásil emes. Bul kele jatqan qaýip-qaterlerdiń aldyn alýmen baılanysty. Sondyqtan da bizdiń partııa Qazaqstan halqy Assambleıasynyń bastamasyn qoldady. Osydan «Aq jol» partııasynyń bul prezıdenttik saılaýǵa qatysýy týraly suraq týyndaıdy», dedi Azat Turlybekuly. Bul rette, partııa serkesi Qazaqstanda jáne onyń syrtynda memlekettik organdar jumysyna yrǵaq beretin, ekonomıkaǵa progressıvti mindetter qoıa biletin jáne ultty uıystyra alatyn Nursultan Nazarbaevqa teńeser saıası jáne memlekettik tulǵa joq degendi de basa aıtty. Ol, sondaı-aq, ulttyq múddelerdi alǵa jyljytý men memlekettilikti nyǵaıtý; óndiristik ekonomıkany qurý men kásipkerlerdi qoldaý baǵyttarynda Nursultan Nazarbaevtyń kóp nárse istegenin jáne isteı alatynyn erekshe atady. «Biz mıllıardtaǵan ınvestısııalar tartý, kásiporyndarymyzdy zamanaýı quraldarmen jabdyqtaý, qyzmetkerlerimizdi shetelde oqytý, halyqaralyq naryqqa erkin shyǵý jáne basqa da kóptegen múmkindikterge ıe bolyp otyrmyz. 20 jyl buryn bizde munyń birde-biri bolǵan emes. Bizge úlken bızneske jol ashqan – Nursultan Nazarbaev. Ol bizdi úıretti, kómektesti, baǵyt berdi jáne jańa jeńisterge shabyttandyrdy», dedi «Aq jol» partııasynyń basshysy sózin qorytyndylaı kelip. Sóıtti de, 26 sáýirdegi prezıdenttik saılaýda «Aq jol» demokratııalyq partııasy Nursultan Nazarbaevtyń kandıdatýrasyna qoldaý kórsetsin degen usynys engizdi. Bul usynys sezd delegattary tarapynan qoldaý tapty. Asqar TURAPBAIULY, «Egemen Qazaqstan». ASTANA. Jastar – Elbasynyń senimdi tiregi «Nur Otan» partııasy Aqtóbe qalalyq fılıalynyń jáne «Jas Otan» jastar qanaty belsendileriniń uıymdastyrýymen Tuńǵysh Prezıdent atyndaǵy ortalyq mádenıet jáne demalys saıabaǵynda «Nur Otan» partııasynyń kezekti HVI sezinde kezekten tys prezıdenttik saılaýǵa úmitker retinde usynylǵan Elbasy N. Nazarbaevtyń kelisim berýine arnalǵan flesh-mob ótkizildi. Oǵan «Nur Otan» partııasynyń oblystyq jáne qalalyq saıası keńesiniń músheleri, qalalyq máslıhat depýtattary, bastaýysh partııa uıymdarynyń tóraǵalary, «Jas Otan» jastar qanatynyń belsendileri qatysty. Barlyǵy 500-den astam adam qatysqan flesh-mob yrǵaqty qımylmen birge jastardyń Elbasynyń saılaýǵa túsýge kelisim bergenine degen ystyq yqylastarymen, sondaı-aq, prezıdenttikten úmitker Nursultan Nazarbaevty qoldaıtyndyqtaryn bildirgen tilekterimen astasyp jatty. – Bul kún qazaqstandyqtardyń esinde aıryqsha saqtalady. Nursultan Ábishuly qazaqstandyqtardyń ózin osy joly da úmitker retinde prezıdenttik saılaýǵa usynýdy qalaǵan tilekterin jerge tastamady, ózindik tarıhı sheshim jasady. Sezd delegattary Nursultan Nazarbaevtyń kelisimin biraýyzdan qoldady, bekitti. Bul eli sengen erdiń isi boldy. Munyń ózi Qazaqstandy damyǵan 30 eldiń qataryna engizýge baǵyt ustaǵan batyl qadamyn alǵa aparýǵa taǵy bir múmkindik týǵyzady degen senimge jeteleıdi. Prezıdenttiń «Nurly Jol» baǵdarlamasyn júzege asyrýyna alǵyshart jasaıdy. Sondaı-aq, «Nur Otan» partııasynyń kezekti XVI sezinde sóılegen sózinde Memleket basshysy Qazaqstan qoǵamyn damytýdyń bes baǵytyn usyndy. Munyń bári álemdik daǵdarys jaǵdaıynda alǵa basýdyń naqty isterimen aıqyndalatynyn da taldap jetkizdi. Mine, osyny túsingen jastardyń osyndaı bastama jasap, ıgi shara ótkizip qoldaýynyń ózi Nursultan Ábishulyna degen el seniminiń aıqyn kórinisi deý oryndy bolmaq, – dedi partııanyń oblystyq fılıaly saıası keńesiniń múshesi Jumabek Kýkanov. – Men bolashaq metallýrgpin, «Jas Otan» jastar qanatynyń belsendi múshesimin. Partııanyń kezekti XVI sezinde «Nur Otan» partııasynyń atynan qazirgi Elbasy N.Nazarbaevtyń alda bolatyn kezekten tys prezıdenttik saılaýǵa óz kandıdatýrasyn usynǵan partııalastarynyń senimine kelisim bergen tarıhı sheshimine oraı osy sharany uıymdastyryp otyrmyz. Jastardyń azamattyq kózqarasy – Qazaqstannyń bolashaǵyn aıqyndaıtyn ustanym. Biz Elbasynyń el tizginin ustap, halqynyń erteńi úshin eren eńbek etýine senim artamyz, – dedi Q.Jubanov atyndaǵy Aqtóbe memlekettik óńirlik ýnıversıtetiniń II kýrs stýdenti Islam Esenǵazıev. Tuńǵysh Prezıdent atyndaǵy ortalyq mádenıet jáne demalys saıabaǵynda uıymdastyrylǵan flesh-mob ótip jatqanda kún raıy da jarqyrap turdy. Saltanatty shara kóktemniń nurly shýaǵyna malynyp, jastardyń jarqyn júzderimen, ásem de yrǵaqty bılerimen ajarlanyp júre berdi. Satybaldy SÁÝIRBAI, «Egemen Qazaqstan». AQTО́BE.Qaryshty Qazaqstan úshin
Oral qalasynda ári oblystyń barlyq aýdan ortalyqtarynda bir mezgilde ótkizilgen jastar uıymdarynyń flesh-mobynda prezıdenttik saılaýǵa qatysty qoldaý sharalary kórinis tapty. Qazaqstannyń Batystaǵy qaqpasynyń Mánshúk Mámetova atyndaǵy alańyna jınalǵan júzdegen jas «Seniń daýysyń – seniń bolashaǵyń!», «Jastar saılaýdy qoldaıdy», «Biz – qaryshty Qazaqstan úshin» dep jazylǵan urandar men plakattardy joǵary kóterip ustap shyǵyp, bıylǵy 26 sáýirde ótkiziletin prezıdenttik saılaýǵa turǵyndardy túgel qatysýǵa shaqyrdy. – Elimizdiń turaqty ári ornyqty damýyn qamtamasyz etý isi tek joǵary jaqta jasalmaıdy. Oǵan el jastary men stýdentteri de qatysyp, óz úlesterin qosatyn bolsa jáne qoǵamda bolyp jatqan úderisterge belsendi túrde aralassa, memleketimizdiń bolashaǵy da soǵurlym jarqyn bola túsedi, – dedi flesh-mob barysynda gazet tilshisine Batys Qazaqstan oblystyq jastar saıasaty máseleleri basqarmasy basshysynyń mindetin atqarýshy Nurlybek Daýmov. Búgingi flesh-mobtyń basty maqsaty da osy, dedi ol odan ári. Osy aksııanyń sheńberinde biz jastardy oń qoǵamdyq qubylystardyń bir jaq shetinde qalyp qoımaýǵa shaqyramyz. Árbir qazaqstandyq óren óz daýysy memleketimizdiń qalypty damý úderisine bir tamshy bolyp qosylatynyn sezine alsa, alǵa qoıǵan maqsatymyzdyń oryndalǵany. Iá, Jaıyqtaǵy jastar jetekshisi aıtqandaı, munda el erteńi bolyp tabylatyn búgingi urpaq ókilderiniń azamattyq belsendilikteri joǵary ekendikteri basqosý men jıyn barysynda da aıqyn ańǵarylyp turdy. Flesh-mobqa qatysty is-sharalar sheńberinde oǵan qatysýshylar «Qazaqstan-2050» emblemasy belgilengen plakatqa saılaýǵa tegisteı qatysý jónindegi únqosýdy bildiretin qoldaryn qoıyp, ony geldi sharlardyń kómegimen aspanǵa ushyrdy. Jaıyq jastarynyń aq nıetteri men tilekterin qoldaǵandaı keshegi kúni bıylǵy kóktemniń alǵashqy shýaǵy sezilip turdy. Temir QUSAIYN, «Egemen Qazaqstan». ORAL. Ǵalymdar aldaǵy saılaýǵa ún qosty Almatydaǵy Ǵylym ordasynda otandyq ǵylymǵa eńbegi sińgen ǵalymdar bas qosyp, 26 sáýirde ótetin prezıdenttik saılaýǵa túsetin Elbasy Nursultan Nazarbaevtyń kandıdatýrasyna qoldaý kórsetti. Ulttyq Ǵylym akademııasynyń prezıdenti Murat Jurynov ǵylym ókilderiniń keleli basqosýynda egemendik alǵannan bergi memleket tarıhyn qysqasha baıandap, óz aldyna tizgin ustap ketken taǵdyrlas elderdiń jaǵdaıy men Táýelsiz Qazaqstannyń ómir jolyna, ustanǵan baǵyty men jetken jetistikterine arnaıy toqtaldy. Derbes qadamyn táı-táı basyp, ózindik jańa tarıh belesine umtylǵan jas memlekettiń tizgini men jaýapkershiligin batyl túrde qolǵa alǵan Elbasy Nursultan Nazarbaevtyń shırek ǵasyrǵa jýyq ýaqyt ishinde atqarǵan isteri men sińirgen eńbegi sóz boldy. – Elbasy Nursultan Nazarbaevtyń osy ýaqytqa deıingi júrgizgen syndarly da salıqaly ishki-syrtqy saıasatynyń arqasynda Qazaqstan búgingi tańda halyqaralyq qoǵamdastyq kóshinde úlken bedelge ıe memleket retinde barsha álemge málim bolyp otyr. Elimizdiń álemdik ortadaǵy abyroıy qazirgi Prezıdentimizdiń esimimen tikeleı baılanysty. Onyń halyqaralyq qoǵamdastyq aldynda kóterip otyrǵan usynystary joǵary deńgeıde baǵalanyp, adamzatqa ortaq turaqtylyq pen tynyshtyq jolynda qyzmet etýde. Bizdiń ǵylymı orta, elimizge jáne álemdik ǵylymı keńistikke keńinen tanymal ǵalymdarymyz Elbasy Nursultan Nazarbaevtyń kandıdatýrasyn qoldaımyz jáne qýattaımyz, – dedi Murat Jurynov. Jıyn barysynda minberge shyǵyp sóz sóılegen ǵalymdar aldaǵy saılaýǵa Nursultan Nazarbaevtyń túsýi el ekonomıkasyndaǵy turaqtylyq pen azamattyq qoǵamnyń ilgeri basýyna, jalpy Qazaq eliniń keleshekte álemdik saıası ortada myǵym bolýyna úlken yqpal etetindigin aıtty. Qanat ESKENDIR, «Egemen Qazaqstan». ALMATY.
