Elý toǵyz máslıhat depýtaty saılanady

«Qazaqstan Respýblıkasyndaǵy saılaý týraly» Qazaqstan Respýblıkasy Konstıtýsııalyq zańynyń 101-baby 4-tarmaǵyna sáıkes osy jylǵy 29 naý­ryzda elimizdiń 14 óńirindegi 59 saılaý okrýginde máslıhattardyń shyǵyp qalǵan depýtattarynyń ornyna saılaý ótedi. Saılaýda barlyǵy 59 depýtat – Astana qalasy máslıhatynyń bir depýtaty, oblystyq máslıhattyń 8 depýtaty, qalalyq máslıhattyń 10 depýtaty jáne aýdandyq máslıhattyń 40 depýtaty saılanady. Ortalyq saılaý komıssııasynyń habarlaýynsha, saılaý naýqany barysynda 196 kandıdat usynyldy, olardyń 60-yn saıası partııalar usyndy, 136-sy ózin ózi usynǵandar. Qazirgi kezde máslıhattar depýtattyǵyna kandıdattardy tirkeý aıaqtaldy. Barlyǵy 179 kandıdat tirkeldi. Olardyń ishinde 128 er adam jáne 51 áıel bar, 60 kandıdat saıası partııalardyń músheleri bolyp tabylady, 72-si partııa qatarynda joq, taǵy 47-si ózderiniń partııaǵa tıesililigin kórsetpegen. Tirkelgen kandıdattardyń arasynda 9 ulttyń ókili bar. Olardyń ortasha jasy – 42 jas, 152 kandıdat joǵary bilimdi, 22 kandıdattyń arnaıy orta jáne 5 kandıdat orta bilimdi. Kandıdattardyń 55,3 paıyzy memlekettik mekemelerde, uıymdar men kásiporyndarda, 33,5 paıyzy kommersııalyq qurylymdarda jumys isteıdi. Al 6,1 paıyzy saıası partııalar men úkimettik emes uıymdardyń qyzmetkerleri, 5,1 paıyzy basqa kásip túrlerimen aınalysady. Qazirgi kezde kúntizbelik josparǵa sáıkes saılaý aldyndaǵy úgit kezeńi bastaldy, ol 27 naýryzda saǵat 24.00-de aıaqtalady. Saılaý bolatyn kúnniń aldyndaǵy kúni jáne daýys berý kúni saılaý aldyndaǵy úgitke tyıym salynady. 14 naýryzdan bastap ýchaskelik saılaý komıssııalarynyń úı-jaılarynda azamattar saılaýshylar tizimderimen tanysa alady, ondaǵy ózderi týraly málimetterdi tekserýi múmkin jáne qateler jiberilgen jaǵdaıda túzetýler engizýdi talap etedi. Saılaý naýqany qajetti qarjylyq jáne materıaldyq-tehnıkalyq resýrs­tarmen qamtamasyz etilgen jáne saılaý zańnamasynyń normalaryna qatań túrde sáıkes júrgiziledi. Álısultan QULANBAI, «Egemen Qazaqstan».