Shaǵyn jáne orta bıznes zańmen qorǵalady

Keshe Ortalyq kommýnıkasııalar qyzmetinde ótken baspasóz máslıhatynda Ulttyq kásipkerler palatasynyń ókilderi Iýrıı Tileýmuratov pen Jibek Ájibaeva shaǵyn jáne orta bıznestiń oıdaǵydaı damyp jatqanyn aıtty. Memleket basshysynyń tóraǵa­lyǵymen ótken Úkimettiń keńeıtilgen otyrysynda shaǵyn jáne orta bıznesti damytýǵa qatysty tapsyrmalardyń qalaı oryndalyp jatqanyna toqtalǵan spıkerler, qazirgi kórsetkishterdiń kóńil qýantatynyn jetkizdi. «Elimizde shaǵyn jáne orta bıznesti damytý isi durys jolǵa qoıylǵan. Naqty sanǵa júginsek, ótken bir jyldyń ózinde jańadan isin bastaǵan kásipkerlik 30 myńǵa kóbeıipti. Ras arasynda tolyqqandy jumys isteı almaı jatqandary da bar. Desek te, saladaǵy ónim kóleminiń ulǵaıýy men eńbek ónimdiliginiń artýy oıdaǵydan jaqsy. Eger osy qarqynmen alǵa jyljysaq, 2030 jylǵa qaraı ishki jalpy ónimniń 40 paıyzdan astamyn shaǵyn jáne orta bıznes qanaǵattandyrady degen úmit bar», dedi Iý.Tileýmuratov. Otandyq óndirýshilerdiń taýaryn saýdada ótkizý sharasy da áńgime ózegine aınaldy. «Eldegi taýar óndirýshilerdi qoldaýǵa oraı «Qazaqstanda jasalǵan» aksııasy aıasynda bizdiń palata men Ulttyq ekonomıka mınıstrligi birlesip, óńirlik palatalar men jergilikti atqarýshy organdardy qatystyra otyryp tıimdi is-sharalar josparyn daıyndadyq. Onda kásipkerler palatasy men jergilikti atqarýshy organdardyń uıymdastyrýshylyq qyzmeti anyq kórsetilgen», degen J.Ájibekova otandyq taýarlardy tutynýshylarmen de keshendi jumys júrgizý kerektigin aıtty. Onyń sózine qaraǵanda, búgingi kúni tutynýshylardy bári umytqan sııaqty. Olarmen eshkim arnaıy jumys istemeıdi. Tek sońǵy kezderi osy baǵytta túrli aksııa­lar men baıqaýlar josparlana bastaǵan. «Mysaly, budan bylaı tutynýshylardyń bergen baǵasy negizinde jyldyń úzdik taýaryn anyqtaımyz. Onda tek jergilikti atqarýshy organdardy, memlekettik resýrstardy ǵana emes, sondaı-aq, jas­tardy da meılinshe kóp tartamyz. Qazir «Qazaqstanda jasalǵan» aksııasyn qoldaý maqsatynda úlken forým ótkizýge daıyndalyp jatyrmyz», dep qorytty ol sózin. Brıfıngte Reseı taýarlarynyń tym arzandaýynan bolǵan otandyq naryqtaǵy keleńsizdik te nazardan tys qalmady. Atap aıtqanda, sońǵy kezderi Reseı naryǵynyń turaqsyzdyǵy nátıjesinde suranysy joǵary halyq sharýashylyǵy taýarlary men azyq-túlik ónimderine baǵa kúrt quldyrady. «Bul jaǵdaı bizdiń el ekonomıkasyna da óz yqpalyn tıgizbeı qoımaıtyny belgili. Osy rette biz otandyq kásipkerlerimizge tıisti deńgeıde qoldaý kórsetýimiz kerek. Ondaı kómek bolady. Tek, zań aıasynda ǵana. Iаǵnı, arnaıy zań qabyldaý arqyly shaǵyn jáne orta bıznestegi kásipkerlerdi qoldap, qorǵaý jumystaryn biz osy kúnderi qolǵa aldyq», dedi J.Ájibaeva. Nurbaı ELMURATOV, «Egemen Qazaqstan».