Ata Zań merekesi Mılanda atalyp ótildi

Qazaqstan Konstıtýsııasynyń kúni ejelgi órkenıet ordasy – Italııa elinde atalyp ótildi. Mılan qalasynda ótip jatqan EKSPO-2015 Halyqaralyq jetistikter kórmesindegi Qazaqstan pavılonynyń aldyndaǵy alańda osy aıtýly kúnge arnalǵan merekelik sharalar bolyp ótti. Álem halyqtary jetis­tik­te­riniń jádigerlerin pash etetin EKSPO kórmesi – jahandyq iri halyqaralyq sharalardyń biregeıi. Mine, birneshe aıdan beri Mılan qalasyna dúnıe júziniń nazary aýǵan. Kórmege tórtkúl dúnıeniń tórt buryshynan at izin salǵan týrısterdiń Qazaq­stan Respýblıkasy pavılo­nyna soqpaı ketkenderi kem de kem. Mamandardyń aıtýy bo­ıynsha, EKSPO-2015 Halyq­aralyq jetistikter kórme­sin­degi pavılondardyń ishinde qazaq­­stan­dyq pavılonnyń mereıi ústem bolýda. Qazirdiń ózinde elimiz­diń pavılonyna 600 myńnan astam kórermen kelgen. Kórme aıaqtalǵanǵa deıin olardyń sany 1 mıllıonnan asyp túsetindigi kámil. «EKSPO Búkilálemdik jetis­tikter kórmesi 120 jyldan astam ýaqyttan beri eń damyǵan elderde ótkizilip keledi. Qazaqstan – jer kólemi jaǵynan álemdegi toǵyzynshy el bolyp sanalady. Bizdiń elimizde 140-qa jýyq ult ókilderi tatý-tátti ómir súrýde. Qazaqstan – Ortalyq Azııadaǵy jáne TMD-daǵy kóshbasshy memlekettiń biri. Konstıtýsııa – bizdiń elimizdiń qol jetkizgen jetistikteriniń tuǵyry, teń quqyq pen múmkindikterdiń kepili. Qazaqstannyń kelesi EKSPO kórmesin óziniń astanasynda ótkizý qurmetine ıe bolýy da sonyń aıqyn aıǵaǵy», dedi Mılandaǵy Qazaqstan Konstıtýsııasy kúnine arnalǵan merekelik saltanatta sóılegen sózinde «Astana EKSPO-2017» UK» AQ basqarma tóraǵasy Ahmetjan Esimov. Budan keıin Ahmetjan Esimov ıtalııalyq jýrnalısterdiń qoıǵan birqatar suraqtaryna jaýap berdi. Olardyń biri Mılanda ótip jatqan kórmede óziniń pavılonymen kópshilikti tańdandyrǵandaı, Qazaqstan EKSPO-2017 Halyq­aralyq kórmesin joǵary dárejede ótkize ala ma degen suraq qoıdy. «Astanada ótetin kórmeniń taqy­rybynyń ózi búgingi tańda álemdegi eń mańyzdy másele bolyp otyr, oǵan qosa Qazaqstan EKSPO kórmesin ótkizýdegi ıtalııalyq áriptesteriniń tájirıbesin molynan paıdalanady», dep jaýap berdi «Astana EKSPO-2017» UK» AQ basqarma tóraǵasy. Mılan­daǵy Qazaqstan pavılony aldyn­daǵy mereke elimizdiń óner sheber­leriniń konsertine ulasty. Jaras SADÝAQASOV.